जळगाव : दोन दिवसांपूर्वी पाच हजार ८०० रुपयांनी घसरण झालेल्या चांदीच्या भावात सोमवार, ११ जानेवारी रोजी पुन्हा एक हजार ५०० रुपयांनी घसरण होऊन चांदी ६३ हजार रुपये प्रति किलोवर आली. सोन्याच्याही भावात ५०० रुपयांनी घसरण होऊन ते ५० हजार १०० रुपये प्रति तोळ्यावर आले. कोरोना लसचा ड्राय रन झाल्यानंतर आता प्रत्यक्षात लसीकरणाच्या हालचाली सुरू असल्याने त्याचा परिणाम सोने-चांदीच्या भावावर होत असल्याचे सांगितले जात आहे.
गेल्या आठवड्यात सोमवार, ४ जानेवारीपासून दोन दिवस चांदीच्या भावात वाढ झाली. मात्र त्यानंतर ते भाव पुन्हा कमी-कमी होत गेले व शनिवार, ९ जानेवारी रोजी तर एकाच दिवसात चांदीच्या भावात पाच हजार ८०० रुपयांनी घसरण झाली होती. त्यानंतर सोमवारी आठवड्याच्या पहिल्याच दिवशी सुवर्ण बाजार उघडताच चांदीच्या भावात पुन्हा एक हजार ५०० रुपयांनी घसरण झाली. त्यामुळे चांदीचे भाव ६४ हजार ५०० रुपयांवरून ६३ हजार रुपये प्रति किलोवर आले. अशाच प्रकारे सोन्याच्याही भावात शनिवारी एक हजार रुपयांनी घसरण झाली होती. त्यानंतर सोमवार, ११ जानेवारी रोजी त्यात पुन्हा ५०० रुपयांनी घसरण होऊन ते ५० हजार १०० रुपये प्रति तोळ्यावर आले.
पाच दिवसात ८५०० रुपयांनी घसरली चांदी
गेल्या पाच दिवसातील स्थिती पाहता चांदीचे भाव तब्बल आठ हजार ५०० रुपयांनी घसरले आहेत. ६ जानेवारी रोजी ७१ हजार ५०० रुपयांवर असलेल्या चांदीच्या भावात ७ रोजी एक हजार २०० रुपयांनी घसरण होऊन चांदी ७० हजार ३०० रुपयांवर आली होती. त्यानंतर ८ रोजी हे भाव कायम राहिले व ९ रोजी थेट पाच हजार ८०० रुपयांनी घसरण झाली आणि चांदी ६४ हजार ५०० रुपयांवर आली होती. आता पुन्हा सोमवारी एक हजार ५०० रुपयांनी घसरण झाली व चांदी ६३ हजार रुपयांवर आली. अशाच प्रकारे पाच दिवसात सोन्याचे भाव दोन हजार ३०० रुपयांनी घसरले. ६ रोजी ५२ हजार ४०० रुपयांवर असलेल्या सोन्याच्या भावात ७ रोजी ८०० रुपयांनी घसरण होऊन ते ५१ हजार ६०० रुपयांवर आले. ८ रोजी तेच भाव कायम राहून ९ रोजी एक हजार रुपयांनी घसरण झाली होती. सोमवारी पुन्हा ५०० रुपयांनी घसरण होऊन सोने ५० हजार १०० रुपये प्रति तोळ्यावर आले.