धरणगाव : पालकमंत्री गुलाबराव पाटील यांना काळे झेंडे दाखविणाऱ्या भाजपच्या दहा पदाधिकाऱ्यांविरुद्ध धरणगाव पोलिसात गुन्हा दाखल करण्यात आला आहे.
सोमवारी धरणगाव येथे महात्मा गांधी उद्यानाच्या उद्घाटन कार्यक्रमासाठी पालकमंत्री गुलाबराव पाटील हे आले असता भाजप कार्यकर्त्यांनी त्यांना काळे झेंडे दाखवित घोषणाबाजी केली होती.
संजय छगन महाजन, भाजप शहराध्यक्ष दिलीप श्रावण महाजन, ललित बाळकृष्ण येवले, कडूसिंग बयास, कैलास मधुकर माळी, प्रवीण महाजन, पूनीलाल भादू महाजन, शिरीष घनश्यामसिंग बयास, कन्हैय्या भास्कर रायपूरकर आणि जिजाबराव गिरधर पाटील अशी गुन्हा दाखल झालेल्यांची नावे आहेत. या सर्वांनी पोलीस स्टेशनची कोणतीही पूर्व परवानगी न घेता बेकायदेशीर जमाव जमवून जिल्हाधिकारी यांच्याकडील आदेशाचे उल्लंघन केल्याने त्यांच्याविरुद्ध गुन्हा दाखल करण्यात आला आहे. पोकॉ. श्यामराव उखा भिल यांनी याबाबत फिर्याद दिली.