पडताळणी समितीचा निर्णय उच्च न्यायालयाने केला रद्द
चोपडा जि. जळगाव : चोपडा येथील शिवसेनेच्या आमदार लता सोनवणे यांचे जात प्रमाणपत्र रद्द ठरविण्याचा नंदुरबार येथील जात पडताळणी समितीचा निर्णय उच्च न्यायालयाने रद्द ठरविला आहे.
न्यायाधीश गंगापूरवाला आणि न्यायाधीश कुलकर्णी यांच्या खंडपीठाने ३ रोजी हा निर्णय दिला. लता सोनवणे ह्या चोपडा विधानसभा मतदारसंघातून अनुसूचित जमाती या प्रवर्गातून निवडून आल्या आहेत. चोपड्याचे माजी आमदार जगदीशचंद्र रमेश वळवी यांनी या निवडीला आव्हान देत सोनवणे यांचा जातीचा दाखला अवैध असल्याची तक्रार औरंगाबाद खंडपीठाकडे केली होती. यावर खंडपीठाने नंदुरबार येथील जात पडताळणी समितीकडे चौकशी करण्याचे आदेश दिले होते.
नंदुरबार येथील जात पडताळणी समितीने सोनवणे यांचे अनुसूचित जमातीचे प्रमाणपत्र अवैध असल्याचा निर्णय जाहीर केला होता. या निर्णयाविरुद्ध सोनवणे यांनी औरंगाबाद खंडपीठात याचिका दाखल केली होती. यावर सुनावणी झाली आणि जात पडताळणी समितीचा निर्णय उच्च न्यायालयाने रद्द केला.
सोनवणे यांच्याकडून ॲड. आर. एन. दोर्डे, ॲड. भरत वर्मा, ॲड. वसंत भोलाणकर, ॲड. निर्मल दायमा यांनी काम पाहिले.