सभागृहात सभा घेण्याची मागणी : प्रशासनाच्या भोंगळ कारभाराचा सत्ताधारी व विरोधी सदस्यांकडून निषेध ; १० कोटीतील ७४ विषयांना मंजुरी ; शौचालयांचा निधीवरून ॲड.हाडा यांची पक्षधोरणाविरोधात भूमिका ; सत्ताधाऱ्यांमधील गटबाजीही उघड
लोकमत न्यूज नेटवर्क
जळगाव - महापालिकेच्या बुधवारी झालेल्या ऑनलाइन विशेष महासभेत इंटरनेटमुळे अडथळे येत असल्याने शिवसेना सदस्यांनी थेट सभागृहात येऊन, ही सभा ऑनलाइन पद्धतीने न घेता पूर्वीप्रमाणे सभागृहात घेण्याची मागणी करत सभागृहात चांगलाच गोंधळ केला. राज्यात कोरोनाचा प्रादुर्भाव कमी होत असल्याने आता महासभा सभागृहातच घेण्यात यावी, अशी मागणी शिवसेना सदस्यांनी केली. शिवसेना सदस्यांच्या गोंधळामुळे महासभेचे कामकाजदेखील बंद पडले. ऑनलाइन महासभेत इंटरनेटमुळे चांगलीच खिचडी झाली. यामुळे सदस्यांना कोणतेही मुद्दे मांडता येत नव्हते व इतरांनी मांडलेले मुद्दे देखील समजत नव्हते. यामुळे शिवसेना सदस्यांनी प्रशासनाच्या भोंगळ कारभाराचा सभागृहात येऊन निषेध केला.
मनपाच्या विशेष महासभेचे आयोजन बुधवारी करण्यात आले होते. कोरोनामुळे घालून दिलेल्या नियमानुसार ही सभा देखील ऑनलाइन पद्धतीनेचे घेण्यात आली. सभागृहात महापौर भारती सोनवणे, उपमहापौर सुनील खडके, आयुक्त सतीश कुलकर्णी, नगरसचिव सुनील गोराणे आदी उपस्थित होते. सभेच्या सुरुवातीलाच इंटरनेटच्या अडचणी यायला सुरुवात झाली. यामुळे कोणत्याही सदस्याला आपले मुद्दे मांडता येत नव्हते. तसेच इतरांचे मुद्देदेखील ऐकू येत नव्हते. त्यामुळे मनपाच्या या ऑनलाइन महासभेचा चांगलाच फज्जा झालेला पहायला मिळाला.
शिवसेना नगरसेवकांनी सभागृहात येऊन थांबविले कामकाज
सभेत कोणताही मुद्दा समजत नसल्याने संतप्त शिवसेना नगरसेवक थेट सभागृहात दाखल झाले. तसेच कोणताही मुद्दा समजत नसल्याने ही सभा तहकूब करून, सभागृहात सभा घेण्याची मागणी केली. शिवसेना सदस्य सभागृहात आल्यामुळे सभेचे कामकाजदेखील थांबविण्यात आले. शासनाचे आदेश नसल्याचे सांगत सभा ऑनलाइनच घेण्यात येईल, अशी भूमिका महापौरांनी घेतली. यामुळे सभेत चांगलाच गोंधळ झाला. विरोधी पक्षनेते सुनील महाजन, शिवसेना गटनेते अनंत जोशी यांनी नगरसचिवांना इतर मनपात सभागृहात सभा होत असताना जळगाव मनपात वेगळी भूमिका का? असा प्रश्न उपस्थित केला.
भाजपचेही सदस्य दाखल
शिवसेनेचे नगरसेवकदेखील सभागृहात आल्याने काही वेळात भाजपचेदेखील नगरसेवक सभागृहात दाखल झाले. भाजपच्या नगरसेवकांनी देखील इंटरनेटच्या तक्रारी करत सभागृहातच सभा घेण्याची मागणी केली. सभेचे पुढील कामकाज व्हावे म्हणून वाद शांत करत, भाजपचे नगरसेवक सभागृहाच्या बाहेर गेले. मात्र, शिवसेनेच्या नगरसेवकांनी सभागृहातच थांबून सभेत सहभाग घेतला.
ॲड.हाडा यांची पक्षधोरणाविरोधात घेतली भूमिका
१. २५ कोटीतून शिल्लक असलेल्या ३ कोटी ३४ लाख रुपयांच्या निधीतील ५० लाख रुपयात शहरात शौचालय तयार करण्याचा प्रस्ताव महापौरांनी सादर केला होता. या प्रस्तावाला भाजपच्याच नगरसेविका ॲड.शुचिता हाडा यांनी आक्षेप घेत, शहरातील शौचालयांच्या कामासाठी अनेक सामाजिक संस्थादेखील पुढे आल्या आहेत. या संस्थांकडून शौचालये उभारण्यात यावीत, आणि हा निधी इतर कामांवर खर्च करण्यात येण्याची मागणी केली.
२. सामाजिक संस्थांकडे प्रशासनाकडून पाठपुरावा होत नसल्याने ॲड.हाडा यांनी प्रशासनाचा निषेध या सभेत केला. दरम्यान, ॲड.हाडा यांच्या या भूमिकेला भाजपचेच नगरसेवक सचिन पाटील यांनी आक्षेप घेतला. तसेच महापौरांकडे हा प्रस्ताव दिला असल्याने व पक्षाच्या बैठकीत हा विषय ठरल्याने यावर सभागृहाने मंजुरी देण्याची मागणी केली. त्यानुसार हा विषय सभागृहात मंजूर करण्यात आला. मात्र, या विषयावरून भाजपतील गटबाजी पुन्हा थेट सभागृहातच समोर आली.
या विषयांना मिळाली मंजुरी
१. २५ कोटींच्या निधीतील शिल्लक ३ कोटी ३४ लाख रुपयांच्या निधीतून प्रस्तावित ६ कामांना मंजुरी मिळाली. यामध्ये शिवाजीनगर उड्डाणपुलाच्या कामासाठी अडथळा ठरत असलेले विद्युत खांब हटविण्यासाठी १ कोटींची तरतूद करण्यात आली. तसेच या कामासाठी निविदा प्रक्रिया महावितरणकडून न काढता मनपाकडूनच काढण्याचा ठराव देखील सभेत करण्यात आला.
२. वर्षभरापूर्वी स्थापन केलेल्या विविध विशेष समित्यांचा कार्यकाळ संपल्यामुळे या अकरा समित्या बरखास्त करण्याचा ठराव सभेत करण्यात आला.
३. पालकमंत्र्यांनी दिलेल्या आश्वासनानुसार डीपीडीसीकडून मिळणाऱ्या प्रस्तावित १० कोटींच्या निधीतून ७४ कामांच्या खर्चास सभेने मंजुरी दिली. यामध्ये अनेक कामे रस्त्यांची आहेत.
४. शहरातील पिंप्राळा शिवारात फायर स्टेशन उभारण्याबाबत कुलभूषण पाटील यांच्याकडून आलेल्या प्रस्तावाला देखील सभेत मंजुरी देण्यात आली.
‘रायसोनी’ नीतीमुळे महापौरांचा कार्यकाळ यशस्वी, शिवसेना करणार सत्कार
महापौर भारती सोनवणे यांनी माजी महापौर प्रदीप रायसोनी यांच्या कामाच्या पद्धतीमुळे विरोधकांनादेखील विश्वासात घेऊन कामकाज केल्यामुळे मनपा विरोधी पक्षनेते सुनील महाजन यांनी महापौरांचे आभार मानले. तसेच पुढील महासभेत महापौरांचा शिवसेनेकडून जाहीर सत्कार करण्यात येणार असल्याचे सभागृहात सांगितले. महापौर भारती सोनवणे यांच्यासारखे कामकाज आधीच्या महापौरांना जमले नाही व भाजपच्या येणाऱ्या महापौरांनाही जमणार नाही, असाही टोला महाजन यांनी या सभेत हाणला.