जळगाव : सांबर या वन्य प्राण्याच्या शिंगाची तस्करी करणाऱ्या मोहम्मद तरबेज मोहम्मद गालीब (वय २२, रा. खडका रोड, भुसावळ) याला स्थानिक गुन्हे शाखेच्या पथकाने सोमवारी दुपारी गोलाणी मार्केटजवळून अटक केली आहे. त्याच्या ताब्यातील मुद्देमालासह कार जप्त करण्यात आली आहे. याप्रकरणी शहर पोलीस ठाण्यात गुन्हा दाखल करण्यात आला आहे.
भुसावळ येथून एका कारमधून (क्र.एम.एच १९ सी.एफ ३१०६) सांबरचे सिंगे विक्रीसाठी जळगावात येत असल्याची माहिती स्थानिक गुन्हे शाखेचे दीपक पाटील यांना मिळाली होती. त्यानुसार स्थानिक गुन्हे शाखेचे पोलीस निरीक्षक किरणकुमार बकाले,सहाय्यक फौजदार राजेंद्र पाटील, सुनील दामोदरे, प्रमोद लाडवंजारी व दीपक पाटील यांच्या पथकाने दुपारी १२.३० वाजता गोलाणी मार्केटजवळील हनुमान मंदीराजवळ कारला अडवून तपासणी केली असता त्यात सांबर प्राण्याचे दोन शिंगे असल्याचे दिसून आले. कार चालक मोहम्मद तरबेज मोहम्मद गालीब हा उडवाउडवीचे उत्तर देत असल्याने वनविभागाच्या अधिकाऱ्यांना बोलावण्यात आले. ही शिंगे सांबर या वन्यप्राण्याची असल्याची खात्री झाल्यावर शहर पोलीस ठाण्यात गुन्हा दाखल करण्यात आला आहे.