वरखेडी, ता. पाचोरा : जवळच असलेल्या सावखेडा बुद्रुक गावी नुकतेच १७ वर्षांच्या देशसेवेनंतर भारतीय सैन्य दलातून सेवानिवृत्त होऊन आपल्या गावी परतलेल्या जगदीश गोविंदा परदेशी यांनी १५ ऑगस्ट स्वातंत्र्य दिन अमृत महोत्सवी वर्षाचे औचित्य साधून येथील जिल्हा परिषद प्राथमिक विद्यामंदिरास दोन संगणक संच व प्रिंटर भेट दिले आहेत.
त्यांनी सेवानिवृत्त झाल्यानंतर गावातून आपली मिरवणूक काढून गाजावाजा न करता मिरवणुकीसाठी व अन्नदानासाठी येणारा खर्च न करता हा खर्च सत्कारणी लावण्याच्या हेतूने आपल्या गावातील प्राथमिक शाळेत शिक्षण घेत असलेल्या लहान चिमुकल्यांना प्राथमिक स्तरापासूनच डिजिटल तंत्रज्ञानाच्या दृष्टीने संगणकीय ज्ञान अवगत व्हावे व ते या अत्याधुनिक युगातील स्पर्धेत कुठेही कमी पडू नयेत, या हेतूने १ लाख रुपयांपर्यंत खर्च करून शाळेसाठी चार संगणक संच भेट देण्याचा मानस शालेय व्यवस्थापन समितीचे अध्यक्ष ईश्वर परदेशी व मुख्याध्यापिका सुशीला वानखेडे यांच्याजवळ व्यक्त केला होता. परंतु मुख्याध्यापिका सुशीला वानखेडे यांनी त्यांना सांगितले की, आमच्या शाळेत आम्ही फक्त दोनच शिक्षिका नियुक्त आहोत. त्यामुळे आम्हांला चार संगणक नकोत. त्याऐवजी सोबत प्रिंटर द्यावे म्हणून आपण आम्हांला फक्त दोन संगणक संच व प्रिंटर द्यावे, असे सुचविले.
त्याप्रमाणे सेवानिवृत्त आर्मी जवान यांनी १५ ऑगस्ट रोजी सरपंच सुमन वाघ, उपसरपंच राजेश सोनवणे, पोलीस पाटील ज्योती परदेशी, अंगणवाडी सेविका नंदा परदेशी, तंटामुक्त गाव समिती अध्यक्षा आशा पाटील व ग्रामस्थांच्या उपस्थितीत शालेय व्यवस्थापन समिती अध्यक्ष ईश्वर परदेशी यांना हे संगणक संच व प्रिंटर सुपुर्द केले. सूत्रसंचालन मुख्याध्यापिका सुशीला वानखेडे यांनी केले तर उपस्थितांचे आभार शिक्षिका सुषमा गोसावी यांनी मानले.
160821\img_20210815_074154.jpg
सेवानिवृत्त भारतीय सैनिक जगदीश गोविंदा परदेशी हे शाळेला संगणक संच भेट देतांना. सोबत उपस्थित मान्यवर