लोकमत न्यूज नेटवर्क
जळगाव : शहराच्या दैनंदिन सफाई करणाऱ्या वॉटरग्रेस कंपनीने ऑगस्ट महिन्यापासून दुसऱ्या टप्प्यात काम सुरू केल्यानंतर नगरसेवकांच्या तक्रारी बंद झाल्या आहेत; मात्र यामागे मोठे अर्थकारण असल्याचा आरोप सातत्याने होत असून, राष्ट्रवादीचे महानगराध्यक्ष अभिषेक पाटील यांनी थेट ६० नगरसेवकांनी वॉटरग्रेसकडून महिन्याला १५ हजार रुपयांप्रमाणे हप्ता घेतल्याचा आरोप केला होता. मात्र,
सुनील झंवर यांच्या कार्यालयात पोलिसांनी केलेल्या तपासणीत वॉटरग्रेसची कागदपत्रे व डायरी सापडल्याने या महिन्याची वॉटरग्रेसची
‘खुशी’ ला अनेक नगरसेवकांनी दाराबाहेरूनच नकार दिल्याचे समोर आले आहे.
मनपाकडून सफाईचा मक्ता वॉटरग्रेस कंपनीला दिल्यानंतर हा मक्ता चांगलाच गाजत आहे. पहिल्या टप्प्यात कामाच्या तक्रारीनंतर या
कंपनीचे काम थांबविण्यात आले होते; मात्र चार महिन्यांचा ‘ब्रेक’ नंतर पुन्हा वॉटरग्रेसच्या कामाला सुरुवात झाली. दुसऱ्या टप्प्यात
वॉटरग्रेसच्या कामाच्या तक्रारी थांबल्या असल्या तरी नगरसेवकांबाबतच्या तक्रारी वाढल्या आहेत. नगरसेवकांनी वॉटरग्रेसकडून १५
हजारांची ‘खुशी’ मिळत असल्याचे आरोप अनेकांकडून होत आहेत.
डायरीतील नावे अन‌् भीती वाढली
बीएचआर प्रकरणी सुनील झंवर यांच्या कार्यालयात पोलिसांनी तपासणी केल्यानंतर याठिकाणी वॉटरग्रेसची कागदपत्रेही आढळून आली.
तसेच पोलिसांना याठिकाणी डायरी सापडली असून, या डायरीत काही जणांची शॉर्ट नावे सापडली आहेत अन‌् त्यापुढे काही आकडे देखील
आहेत. अशा परिस्थितीत पोलिसांकडून चौकशी होण्याच्या शक्यतेने ठराविक नगरसेवकांमध्ये भीती वाढली आहे. यामुळे अनेकांनी या
महिन्याचा ‘वॉटरग्रेस’ च्या ‘खुशी’ला दुरूनच नकार दिला आहे. दरम्यान, काही मनपा कर्मचाऱ्यांनी ही रक्कम नाकारली असल्याचीही
माहिती मनपाच्या सूत्रांनी दिली आहे. बड्या नगरसेवकाकडे हे वाटपाचे काम होते. मात्र, त्यानेही रक्कम देण्यास व व्हॉट्सॲपवरून कॉल
करण्यासही नकार दिला असल्याची माहिती समोर आली आहे. तर ज्या नगरसेवकांनी ही रक्कम घेतली होती, त्यापैकी अनेकजण ही
रक्कम परत करण्याचा तयारीत आहेत.
‘घरकूल’मधून बोध
घरकूल प्रकरणात अनेकांचा प्रत्यक्ष सहभाग नसतानाही केवळ स्वाक्षरी व ठरावामुळे शिक्षा भोगावी लागली आहे. यामुळे वॉटरग्रेसमध्ये
देखील अशा प्रकारे फसण्याची शक्यता असल्याने अनेकांनी यापासून दूर राहणेच आता पसंत केले आहे. तसेच वॉटरग्रेसबाबत ॲड.विजय पाटील यांनीही काही नगरसेवकांवर गुन्हे दाखल करण्याची मागणी मनपा आयुक्तांकडे केली आहे. त्याबाबत नगरसेवकांमध्ये भीती वाढली आहे.