जळगाव : आमदार सुरेशदादा जैन हे शिवसेनेकडून विधानसभेची निवडणूक लढविणार असल्याचे रविवारी झालेल्या संकल्प मेळाव्यात शिक्कामोर्तब झाले असून दादांच्या अनुपस्थितीत त्यांचे ज्येष्ठ चिरंजीव राजेश जैन यांनी प्रचाराची धुरा सांभाळली आहे. सोमवारी त्यांनी दिवसभर कार्यकर्त्यांच्या भेटीगाठी, बैठका व शाखांच्या उद््घाटन कार्यक्रमात घालविला.
शिवसेना संकल्प मेळाव्याच्या निमित्ताने प्रथमच राजकीय व्यासपीठावर आगमन करणार्या राजेश जैन यांनी सुरेशदादांच्या प्रचाराची धुरा हाती घेत सोमवारी मेळावा कसा झाला? याबाबत कार्यकर्ते, पदाधिकार्यांच्या प्रतिक्रिया जाणून घेतल्या. तसेच भविष्यातील प्रचाराच्या नियोजनाबाबतही चर्चा केली. छोट्या-छोट्या समाजांच्या प्रतिनिधींच्या बैठका आधी घेण्यास सुरुवात करण्याचे ठरले. सोमवारी सायंकाळी सम्राट कॉलनीत शिवसेनेच्या शाखेचे तर रामेश्वर कॉलनीत युवा सेनेच्या शाखेचे उद््घाटनही राजेश जैन यांच्या हस्ते झाले. यावेळी खाविआचे अध्यक्ष रमेशदादा जैन, उपमहापौर सुनील महाजन, माजी महापौर सदाशिवराव ढेकळे, माजी महानगराध्यक्ष गजानन मालपुरे, विधानसभा क्षेत्रप्रमुख शाम कोगटा, महानगर प्रमुख गणेश सोनवणे, कुलभूषण पाटील, युवा सेना जिल्हाप्रमुख प्रितेश ठाकूर, नगरसेवक इकबालोद्दीन पिरजादे, साजीद खाटीक, महानगरप्रमुख शोभा चौधरी आदी उपस्थित होते. फलक अनावरण प्रसंगी उपस्थित राजेश जैन. सोबत मंगला बारी, प्रितेश ठाकूर, कुलभूषण पाटील, गणेश सोनवणे चेतन शिरसाळे, सुनील महाजन, रमेशदादा जैन, सदाशिवराव ढेकळे, गजानन मालपुरे, श्याम कोगटा, शोभा चौधरी आदी. सुरेशदादांचे राजकीय वारसदार
आमदार सुरेशदादांच्या अनुपस्थितीत त्यांच्या प्रचाराची धुरा खांद्यावर घेणारे राजेश जैन हेच यापुढे दादांचे राजकीय वारसदार असतील, असे स्पष्ट झाले आहे. दादांची मुले राजकारणापासून अलिप्त होती. मात्र उद्भवलेल्या परिस्थितीत सुरेशदादांच्या अनुपस्थितीत दादांचे सुपुत्र राजेश जैन हे काका रमेशदादा जैन यांच्या मदतीसाठी राजकीय आखाड्यात उतरले आहेत.