जळगाव - जिल्ह्यात यंदा अनियमित पाऊस होत असून, यामुळे जिल्ह्यातील खरीप हंगामालादेखील मोठा फटका बसत आहे. मात्र, गेल्या दोन दिवसांपासून शहरासह संपूर्ण जिल्ह्यात पावसाने दमदार हजेरी लावली आहे. यामुळे शेतकऱ्यांना काही प्रमाणात दिलासा मिळाला आहे. दरम्यान, आगामी तीन दिवस जिल्ह्यात पावसाची शक्यता ८० ते ९० टक्के असून, ऑगस्ट महिन्याचा पहिल्या आठवड्यातदेखील जोरदार पावसाचा अंदाज हवामान विभागाकडून वर्तविण्यात आला आहे.
‘नीर’तर्फे तुळशी रोपांचे वाटप
जळगाव - नीर फाउंडेशनतर्फे तुळशीची रोपे वाटपाचा उपक्रम राबविण्यात आला. आमदार सुरेश भोळे यांच्या हस्ते या रोपांचे भक्तांना वाटप करण्यात आले. पाणी व पर्यावरण या दोन गोष्टींसाठी नीर फाउंडेशन गेल्या काही वर्षांपासून कार्यरत आहे. याप्रसंगी नीर फाउंडेशनचे संस्थापक सागर महाजन, अध्यक्ष भावेश रोहिमारे, प्रतीक निंबाळकर, नयन पाटील, देव महाजन उपस्थित होते.
वाळू रस्त्यावर उपसली
जळगाव - तालुक्यातील आव्हाणे, खेडी या भागातून अवैधरीत्या वाळूउपसा सुरूच आहे. सोमवारी रात्री अवैधरीत्या वाळू उपसा करणाऱ्या एका डंपर चालकाने महसूलच्या कारवाईच्या भीतीने कानळदा रस्त्याचा मधोमध वाळू उपसून पळ काढला. ही वाळू रस्त्यावर पसरल्याने वाहनधारकांसाठी अडथळा ठरत आहे. वाळूउपसा करणाऱ्यांवर कारवाई करण्याची मागणी होत आहे.