चोपडा : पंतप्रधान आवास योजनेबाबत लाभार्थ्यांना मुदतवाढ द्यावी, अशी मागणी शिवसेनेच्या नगरसेविका संध्या महाजन यांनी केली आहे. याबाबत ३० जुलै रोजी पालकमंत्री गुलाबराव पाटील यांच्या अध्यक्षतेखाली आयोजित बैठकीत संध्या महाजन यांनी निवेदन सादर केले.
विभागीय आयुक्तांच्या पत्रांनुसार कामे सुरू न झालेल्या लाभार्थ्यांना १५ दिवसांची नोटीस देऊन इच्छुक नसलेल्या लाभार्थ्यांची नावे ३० जुलैपर्यंत वगळण्याची कार्यवाही करण्याबाबत नगरपालिकांना आदेश आहेत. चोपडा नगर परिषदेतर्फे पंतप्रधान आवास योजना घटक क्रमांक ४ वैयक्तिक घरकुलास अनुदान अंतर्गत २०० व १३५ लाभार्थी असे २ डीपीआर मंजूर आहेत. सदर घटकांतर्गत लाभार्थ्यांना लाभ घेण्यासाठी बांधकाम परवानगी, त्याकामी कागदपत्रांची पूर्तता, पतव्यवस्था अशा काही बाबींची तजवीज करावी लागते. परंतु मागील दीड वर्षापासून कोरोना विषाणू प्रादुर्भावामुळे लॉकडाऊनच्या पार्श्वभूमीवर कागदपत्रांच्या पूर्ततेसाठी अनेक अडचणींचा सामना करावा लागत आहे. तसेच वाळू उत्खननावर बंदी असल्याने वैयक्तिक घरकुलांचे बांधकाम करण्यास लाभार्थ्यांना अडचणी निर्माण होत आहेत. अशा काही अडचणी असलेल्या लाभार्थ्यांच्या घरकुले बांधकामास सुरुवात झालेली नाही.
परंतु वरील अडचणींमुळे नागरिक इच्छुक असूनही त्यांची नावे वगळण्याची वेळ आलेली आहे. यादीत समाविष्ट लाभार्थ्यांना योजनेचा लाभ व्हावा. त्यामुळे कागदपत्रांची वा इतर अडचण असलेल्या, परंतु बांधकामास इच्छुक लाभार्थ्यांना अधिक वेळ मिळावा, त्यांची नावे वगळण्याची मुदत ३० जुलैवरून वाढविण्यात यावी. तसेच ज्या लाभार्थ्यांची कामे सुरू आहेत, परंतु अनुदानाचे हप्ते पूर्ण मिळाले नाहीत, अशा लाभार्थ्यांना पुढील हप्ते वितरित करण्यासाठी नगर परिषदेस राज्य तसेच केंद्र शासनाचा उर्वरित निधी मिळावा. शहरातील मंजूर लाभार्थ्यांनाही वाळू उत्खननाबाबत सवलत मिळावी. अतिक्रमित जागांवर राहणारे लाभार्थी व भाडेकरू म्हणून राहणारे / बेघर नागरिक यांनीदेखील नगर परिषदेस सन २०१७ पासून अर्ज केलेले आहेत. त्या कामी नगर परिषदांकडून माहिती मागविणे व डीपीआर सादर करण्याकामी उचित त्या कार्यवाहीबाबत निवेदन लाभार्थ्यांना देण्यात आले.
या निवेदनास शिवसेना गटनेता महेंद्र धनगर, नगरसेवक महेश पवार, राजाराम पाटील, रवींद्र पाटील, लताबाई पाटील, मीनाबाई शिरसाठ यांनी अनुमोदन दिले आहे.