जळगाव : कुलूप बंद घरात डल्ला मारून ६८ हजार रूपयांचा ऐवज चोरून नेल्याप्रकरणी एमआयडीसी पोलिसांना एकाला अटक केली आहे. शेख फारूख उर्फ सोनू सलिम शेख (रा. फुकटपूरा, तांबापूरा) असे अटक केलेल्या चोरट्याचे नाव आहे.
१३ सप्टेंबर रोजी रात्री ११.५० वाजेच्या सुमारास सरफराज खान अय्युब खान हे खालच्या घराला कुलूप लावून वरच्या मजल्यावरील घरात झोपण्यासाठी गेले होते. दुस-या दिवशी सकाळी ६.३० वाजता जाग आल्यानंतर त्यांना खालच्या घराचा दरवाजा उघडा दिसला. घरातील ६८ हजार रूपयांचा ऐवज अज्ञात चोरट्यांनी चोरून नेल्याचे त्यांना आढळून आले. त्यानंतर त्यांच्या फिर्यादीवरून एमआयडीसी पोलीस ठाण्यात गुन्हा दाखल करण्यात आला होता. दरम्यान, याप्रकरणी पोलिसांना एका अल्पवयीन मुलाला ताब्यात घेतले होते. त्याच्याजवळून ६१ हजार रूपयांचा मुद्देमाल जप्त करण्यात आला होता. दरम्यान, ही चोरी त्याने त्याचा साथीदार शेख फारूख उर्फ सोनू सलिम शेख याच्या मदतीने केली असल्याची माहिती पोलिसांना चौकशीत दिली होती. त्यानुसार शुक्रवारी शेख फारूख याला शाहूनगरातून अटक करण्यात आली आहे. ही कारवाई एमआयडीसी पोलीस ठाण्याचे सहाय्यक फौजदार अतुल वंजारी, इम्रान सैय्यद, सुधीर साळवे, सचिन पाटील, योगेश बारी, गोविंदा पाटील यांनी केली आहे.