भुसावळ : जळगाव महापालिकेत दोन महिन्यांपूर्वी भाजपचा करेक्ट कार्यक्रम करीत ५७ पैकी २७ नगरसेवक गळाला लावत शिवसेनेने सत्ता मिळविली होती. यानंतर दोन-चार दिवसांपूर्वी मुक्ताईनगर पालिकेतही भाजपचे नगरसेवक शिवसेनेने गळाला लावले व सद्य:स्थितीला जळगाव महापालिकेत भाजपच्या उर्वरित ३० पैकी आणखी ३ नगरसेवकांना गळाला लावत त्यांना शिवबंधन बांधले गेले. आता जळगाव मुक्ताईनगरनंतर अबकी बार भुसावळवर निशाणा साधत भाजपचे काही पदाधिकारी व नगरसेवक नजीकच्या काळामध्ये शिवसेनेत प्रवेश करण्याची दाट शक्यता असल्याची चर्चा राजकीय मंडळींमध्ये असल्याचे दिसून येत आहे.
माजी महसूलमंत्री एकनाथ खडसे यांच्या राष्ट्रवादीत प्रवेशानंतर भाजपच्या अनेक नगरसेवकांच्या कुटुंबीयांनी जाहीररीत्या राष्ट्रवादीत प्रवेश केला आहे. जे पदावर आहेत ते फक्त औपचारिक असल्याचे दिसून येत आहे. अर्धे भाजपचे पदाधिकारी व नगरसेवक खडसेंसोबत राष्ट्रवादीत गेले, तर भुसावळचे उरलेले काही नगरसेवक हे पालकमंत्री गुलाबराव पाटील यांच्यावर विश्वास ठेवून नजीकच्या काळामध्ये शिवबंधन बांधणार असल्याचे विश्वसनीय सूत्रांकडून समजते.
येत्या सहा महिन्यांत नगरपालिकेच्या निवडणुका लक्षात घेता सत्ताधारी पक्षासोबत गेल्यास नक्कीच शहरातील विकास कामे मार्गी लागतील, असा हेतू यामागे दिसून येत आहे. दरम्यान, पालकमंत्री गुलाबराव पाटील यांनीही भुसावळकडे विशेष लक्ष केंद्रित केले असून, रस्ते असो की अमृत योजना आदी प्रत्येक कामाकडे जातीने लक्ष देऊन भरघोस निधी उपलब्ध करून दिला आहे.
जळगाव मुक्ताईनगरनंतर आता भुसावळ भाजपला खिंडार पडणार असून, कोणते दिग्गज चेहरे शिवसेनेत प्रवेश करणार आहेत हे नजीकच्या काळामध्ये स्पष्ट होणार आहे.