वार्तापत्र क्राईम

तळहाताच्या फोडाप्रमाणे जपलेला पोटचा गोळा अचानक सोडून गेल्यानंतर त्या मातेची काय अवस्था होते हे फक्त ती माताच सांगू शकते...एखादी अल्पवयीन मुलगी गायब झाली असेल तर तिच्याबाबतीत अनुचित प्रकार घडला तर काय अवस्था होते, याचे महत्व मातेप्रमाणे खाकीच सांगू शकते. अशाच तीन नाजूक प्रकरणात मातांच्या ह्दयाची सुरु असलेली धगधग पाहता खाकीलाही माणुसकीचा पाझर फुटला अन‌् या मातापित्यांच्या जीव भांड्यात टाकण्याचे कार्य स्थानिक गुन्हे शाखेच्या पथकांनी केले आहे. गेल्या १९ महिन्यापासून जन्मदातीला सोडून पलायन केलेल्या तरुणीला स्थानिक गुन्हे शाखेच्या पथकांनी जळगाव शहरातून ताब्यात घेतले. इतकेच काय पालकत्वाची भूमिका निभावून तिचे समुपदेशन केले. नागपूर येथून घ्यायला आलेला मामा भाचीला पाहून ढसाढसा रडला. बहिणीचे कुंकू आधीच पुसले गेले आहे, त्यात पोटचा गोळा १९ महिन्यापासून गायब झाल्याने तिची अवस्था म्हणजे मरणासन्न झालेली असताना जळगाव पोलिसांनी या मुलीला तिच्या मामांच्या स्वाधीन केले. मुलीच्या आईला आनंदाची वार्ता कळविली. पोलीस निरीक्षक किरणकुमार बकाले, शरद भालेराव व नरेंद्र वारुळे या तिघांना भावनिक साद घालून मामाने जळगाव पोलीस दलाचे आभार मानायला शब्दच नसल्याचे सांगितले. हा प्रसंग म्हणजे चित्रपटात शोभेल असाच होता. याआधी देखील दोन तरुणांनी पळवून नेलेल्या बोदवडच्या अल्पवयीन मुलीला पोलिसांनी शोधून काढले व इंदूर येथून तिला ताब्यात घेऊन पालकांच्या स्वाधीन केले. अवघ्या १२ वर्षाची मुलगी असल्याने या प्रकरणात जन्मदात्यांसह पोलीसही चिंतेत पडले होते. डोळ्यासमोर बोरखेड्याचे चित्र असल्याने पोलिसांची धाकधूक वाढली होती. खुद्द पोलीस अधीक्षक डॉ.प्रवीण मुंढे यांनीच या प्रकरणात लक्ष घातले. मुलगी सुखरुप मिळाल्याने सर्वांनीच सुटकेचा नि:श्वास सोडला. याआधी देखील चाळीसगाव तालुक्यातील अशाच प्रकरणात पोलिसांनी संयमाने प्रकरण हाताळून पुण्यातून मुलीला ताब्यात घेऊन पालकांसमोर आणले. संवेदनशील प्रकरणे पोलिसांनी गांभीर्याने घेऊन हाताळले. खून, चोऱ्या, घरफोड्या यापेक्षाही भावनिक प्रश्न महत्वाचे असून त्यांना खाकीने स्पर्श करुन खाकीतील माणुसकीचे दर्शन घडविले. हे मोजक्या प्रकरणात झालेले असले तरी जिल्ह्यात असे खूप प्रकरणे आहेत, त्यात त्या-त्या अमलदारांनी गांभीर्यपूर्वक लक्ष घातले तर नक्कीच पोलिसांविषयी समाजात वेगळे चित्र निर्माण होईल.