जळगाव : शिव कॉलनी भागातील विनायक सोनवणे खून प्रकरणात जिल्हा व सत्र न्यायाधीश एस.बी.अग्रवाल यांच्या न्यायालयात नम्रता सायकल मार्टचे मालक प्रकाश धनगर हे साक्षी दरम्यान गोंधळले. त्यांना समजावण्याचा प्रयत्न करणार्या सरकार पक्षाला न्यायालयाने फटकारले. आरोपी नाना दाढी याने घटनेच्या दिवशी १२.१0 वाजता १२ नंबरची सायकल नेल्याची साक्ष धनगर यांनी दिली.
विनायक सोनवणे खून प्रकरणात नम्रता सायकल मार्टचे मालक प्रकाश धनगर व पंच महेंद्र सोनवणे यांची सरकारी वकील गोपाळ जळमकर यांनी साक्ष घेतली. धनगर यांनी आपल्या साक्षी दरम्यान घटनेच्या दिवशी नाना दाढी याने नम्रता सायकल मार्टवरून दुपारी १२.१0 वाजेच्या सुमारास १२ नंबरची सायकल नेली होती. त्यानंतर दुसर्या दिवशी आपल्या दुकानावर पोलीस आले. त्यांनी पोलीस निरीक्षक वाय.डी.पाटील यांनी पोलीस स्टेशनला बोलविल्याचे सांगितले. पाटील यांनी १२ नंबरची सायकल कुणी नेली होती याबाबत विचारणा केली. त्यावेळी आपण रजिस्टरमधील नोंद पाहून नाना दाढी याने ती सायकल नेल्याचे सांगितले. यावेळी पोलिसांनी रजिस्टर जप्त केले.
नाना दाढी याला ओळखतो का? अशी विचारणा केल्यानंतर धनगर यांनी होकार दिला. काही वर्षांपूर्वी नाना याची नवीन बसस्थानकाजवळ पानटपरी होती. मात्र घटनेपूर्वी त्याने सायकल भाड्याने नेली नसल्याचे त्याने सांगितले. यावेळी त्याने सायकल ओळखली.
त्यानंतर या प्रकरणातील दुसरे पंच साक्षीदार महेंद्र सोनवणे यांची साक्ष झाली. त्यांनी आपल्यासमोर पोलिसांनी नम्रता सायकल मार्टमधील रजिस्टर जप्त केल्याचे सांगितले. यावेळी बचाव पक्षातर्फे त्यांची उलटतपासणी घेण्यात आली. या प्रकरणात आता गुरुवारी कामकाज होणार आहे.
-----------------
आरोपीतर्फे अँड.अ.वा.अत्रे यांनी धनगर यांची उलटतपासणी घेतली. नाना हा भजे गल्लीत येत नव्हता हे बचाव पक्षाचे म्हणणे नाकारले. यावेळी पोलिसांनी जप्त केलेल्या रजिस्टरमध्ये भाड्याच्या रकमेचा कॉलम सांगत असताना धनगर गोंधळले. त्यावेळी सरकार पक्षाने धनगर यांना समजावण्याचा प्रयत्न केला. त्याला बचाव पक्षाने आक्षेप घेतला. न्यायालयाने 'तुम्ही साक्षीदारांना मदत करीत आहात' अशी सूचना करीत सरकार पक्षाला फटकारले.