लोकमत न्यूज नेटवर्क
जळगाव : घरगुती मीटर व्यावसायिक न करण्यासाठी दोन वेळा पंधरा हजारांची लाच घेतल्यानंतरही लाचेचा मोह न सुटलेल्या महावितरण कंपनीच्या शोभना दिलीप कहाणे (वय ५६, रा. पवननगर, ममुराबाद रोड, जळगाव) या महिला टेक्निशियनला दहा हजारांची लाच घेताना लाचलुचपत प्रतिबंधक विभागाच्या पथकाने सोमवारी दुपारी साडेतीन वाजता रंगेहात पकडले. दीक्षितवाडीतील महावितरणच्या कार्यालयातच ही कारवाई झाली.
जळगाव शहरातील एका ग्राहकाकडे चार भाडेकरु आहेत. त्याचा मीटर एकच आहे. भाडेकरु असल्याने मीटर व्यावसायिक करावे व त्यासाठी दंड आकारला जाईल, असे सांगून महावितरणच्या सीनियर टेक्निशियन शोभना कहाणे यांनी कारवाई टाळण्यासाठी ग्राहकाकडे सुरुवातीला दहा हजारांची मागणी केली. या ग्राहकाने त्याची पूर्तता केली. त्यानंतरही कहाणे यांनी पुन्हा पाच हजार रुपयांची मागणी केली. कटकट नको म्हणून या ग्राहकाने पुन्हा पाच हजार रुपये दिले. त्यानंतरही कहाणे यांचा पैशांचा मोह कमी झाला नाही, त्यांनी या ग्राहकाला पुन्हा दहा हजार रुपये द्यावे लागतील नाही तर दंड आकारू, असा दम भरला. त्यामुळे या ग्राहकाने लाचलुचपत प्रतिबंधक विभागाचे उपअधीक्षक जी. एम. ठाकूर यांची भेट घेत तक्रार दिली.
कार्यालयात लावला सापळा
तक्रारीची पडताळणी झाल्यानंतर पोलीस उपाधीक्षक ठाकूर यांनी सोमवारी दुपारी तीन वाजता निरीक्षक नीलेश लोधी, दिनेशसिंग पाटील, अशोक अहिरे, सुनील पाटील, सुरेश पाटील, रवींद्र घुगे, महिला पोलीस अमलदार शैला धनगर, मनोज जोशी, सुनील शिरसाठ, जनार्दन चौधरी, प्रवीण पाटील, नासीर देशमुख, ईश्वर धनगर व प्रदीप पोळ यांच्या पथकाने दीक्षितवाडीतील कार्यालयात सापळा लावला. ठरलेल्या नियोजनानुसार दहा हजार रुपयांची रक्कम स्वीकारताच शोभना कहाणे यांना अटक करण्यात आली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
आई काम झाले...
लाचेची रक्कम स्वीकारल्यानंतर सापळा लावलेल्या पथकाने यासाठी इशारा निश्चित केला होता. कहाणे यांनी ही रक्कम स्वीकारताच तक्रारदाराने बाहेर थांबलेल्या पथकाला मोबाईलवर संपर्क करून ''आई, काम झाले'' म्हणून सांगितले आणि तितक्यात दोघंही बाहेर येत असताना पथकाने त्यांना रंगेहात पकडले.