वासेफ पटेल
लोकमत न्यूज नेटवर्क
भुसावळ : महामार्गाचे चौपदरीकरण झाले आहे. दुचाकी, चारचाकी वाहनांची वेगमर्यादा वाढली आहे. थोडी जरी चूक झाली, तरी अपघाताला सामोरे जावे लागते. अशीच घटना काही दिवसांपूर्वी साकेगावजवळ महामार्गावर घडली होती. त्यात युवक गंभीर जखमी झाला होता. अपघाताची माहिती युवकाच्या कुटुंबीयांना देताना मदत करणाऱ्यांची तारांबळ उडाली. कारण, त्या युवकाच्या मोबाइलला फिंगर प्रिंट लॉक होते. हाताला रक्त लागल्यामुळे लॉक उघडून फोन लावताना खूप वेळ गेला. एकाने युवकाची ओळख पटवून संबंधित युवकाच्या घरी माहिती दिली, मात्र ओळख पटली नसती तर फार उशीर झाला असता...
मोबाइलमधील आपली माहिती सुरक्षित राहावी, यासाठी अनेक जण मोबाइलला लॉक करतात. त्यात फिंगर प्रिंट लॉक, पॅटर्न लॉक, पासवर्ड लॉक, फेस लॉक असे प्रकार आहेत. एखाद्या व्यक्तीसोबत अनुचित घटना घडल्यास त्याला मदतीची गरज असते. यासाठी त्याचे मित्र किंवा नातेवाइकांना वेळीच माहिती देणे गरजेचे असते.
...तर जीवावरही बेतू शकते
अनुचित घटना वा अपघातप्रसंगी मोबाइल लॉक असल्यास घटनास्थळावरील व्यक्तीला अपघातग्रस्ताच्या नातेवाइकांशी संपर्क साधणे अशक्य होऊ शकते. याचा परिणाम हा जीवावरही बेतू शकतो. प्ले स्टोअरमध्ये सरकारी तसेच काही खासगी ॲप उपलब्ध आहेत.
कोणत्या प्रकारचे मोबाइल लॉक वापरतात?
फिंगर प्रिंट लॉक ४५ टक्के
पॅटर्न लॉक २७ टक्के
पासवर्ड लॉक २० टक्के
फेस लॉक ५ टक्के
लॉक न करणारे ३ टक्के
फोनला नको ॲपला करा लॉक
एखाद्या व्यक्तीची व्हॉट्सॲप, फोटो, इतर चॅटमधील माहिती ही खासगी असते. त्यामुळे फक्त अशाच ॲपला लॉक केल्यास फोन लावण्यासाठी कुठल्याही पासवर्डची गरज पडत नाही. त्यामुळे आपला डेटा सुरक्षित राहतोच. सोबतच आपत्कालीन परिस्थितीत मदतीकरिता दुसरी व्यक्ती फोन वापरू शकते.
मोबाइलच्या एसओएसमध्ये मदतीसाठी नंबर सेव्ह केले तरी आपल्याला मदत करायला येणाऱ्या व्यक्तीला एसओएस कसे वापरावे, याची माहिती असावी लागते. ती माहिती नसल्यास मदत मागणे मुश्कील होते. प्रत्येक व्यक्तीच्या मोबाइलमध्ये खूपच खासगी माहिती असतेच, असे नाही. तरी अनेकजण मोबाइल लॉक करतात. यापेक्षा फक्त गरजेचे ॲप लॉक केले, तर अडचणीच्या काळात मोबाइलवरून संपर्क साधणे सोपे होते.
- इमरान शेख, मोबाइल विक्रेते, भुसावळ
एसओएस पद्धतीचा वापर
प्रत्येक मोबाइलमध्ये एमर्जन्सी एसओएस (सेव्ह अवर सोल म्हणजेच मला वाचवा) ही यंत्रणा असते. यात पोलीस, रुग्णवाहिका तसेच आपल्याजवळच्या व्यक्तींचे मोबाइल नंबरदेखील सुरक्षित करता येतात. एखाद्या वाईटप्रसंगी याचा वापर करून मदत घेतली जाऊ शकते.