दोन्ही पक्षांकडून सत्तास्थापनेचे दावे-प्रतिदावे : सेनेकडून जयश्री महाजन निश्चित मात्र भाजपकडून अजूनही उमेदवाराची घोषणा नाही
लोकमत न्यूज नेटवर्क
जळगाव : महापौर व उपमहापौरपदाच्या निवडणुकीसाठी अवघे चार दिवस शिल्लक असतानाच भाजपमध्ये उभी फूट पडल्याने आता राजकीय समीकरणे बदलण्याची शक्यता आहे. शिवसेना व भाजपकडून महापौर आमचाच होईल, असे दावे केले जात आहेत. शिवसेनेने महापौर व उपमहापौर पदासाठीचे उमेदवार जाहीर केले असले तरी भाजपकडून मात्र अद्यापपर्यंत उमेदवार जाहीर करण्यात आलेला नाही. दोन्ही ही पक्षांकडून होत असलेल्या दावे-प्रतिदाव्यांमुळे महापौर व उपमहापौरपदाची निवडणूक ही अटीतटीची होण्याची शक्यता आहे.
शिवसेनेकडून महापौरपदासाठी जयश्री महाजन यांचे, तर उपमहापौरपदासाठी कुलभूषण पाटील यांचे नाव निश्चित केले आहे. मात्र, भाजपकडून कोणतेही नाव अद्याप जाहीर करण्यात आलेले नाही. प्रतिभा कापसे यांचे नाव आघाडीवर असून, उपमहापौरपदाबाबत मात्र पक्षात अजूनही एकमत होऊ शकलेले नाही. गटनेते भगत बालाणी, सुरेश सोनवणे, डॉ. चंद्रशेखर पाटील, धीरज सोनवणे यांचे नाव आघाडीवर असले तरी बदललेल्या राजकीय समीकरणामुळे भाजपकडून ऐनवेळी महापौर व उपमहापौरपदासाठीच्या नावात ऐनवेळी बदलदेखील होण्याची शक्यता आहे.
जयश्री महाजन
जयश्री महाजन या प्रभाग क्रमांक १५ मधून विजयी झाल्या आहेत. मनपात सलग दुसऱ्यांदा विजयी झाल्या असून, याआधी महिला व बालकल्याण समितीत सदस्या म्हणून त्यांनी काम केले आहे. सेनेचे विद्यमान मनपा विरोधी पक्षनेते सुनील महाजन यांच्या त्या पत्नी आहेत.
मजबूत बाजू
शिवसेनेकडून दावा केला जात असल्याप्रमाणे भाजपचे २७ नगरसेवक फुटले असतील तर जयश्री महाजन यांच्याकडे एमआयएम चे ३ व शिवसेनेचे १५ नगरसेवक मिळून बहुमताचा आकडा ४५ पर्यंत जाण्याची शक्यता आहे. यासह लेवा समाजातील उमेदवार असल्याने भाजपतील इतर मतेदेखील फुटण्याची शक्यता.
उणिवा
भाजपकडूनही सत्तास्थापनेचा दावा केला जात आहे. त्यातच भाजपचे २/३ एवढे नगरसेवक न फुटल्यास त्या नगरसेवकांवर अपात्रतेची करवाई झाल्यास महाजनांना अडचणी येऊ शकतात. तसेच भाजपकडून फुटलेल्या काही नगरसेवकांना पुन्हा पक्षाकडे खेचल्यास काही मतांची कमतरता महाजन यांना पडू शकते.
प्रतिभा कापसे
प्रतिभा कापसे प्रभाग क्रमांक ९ मधून भाजपकडून विजयी झाल्या आहेत. सलग तिसऱ्यांदा विजयी झाल्या आहेत. याआधी राष्ट्रवादीकडून त्या विजयी झाल्या होत्या. २०१८ मध्ये त्यांनी भाजपमध्ये प्रवेश केला होता.
मजबूत बाजू
सर्वांत मजबूत बाजू म्हणजेच सद्य:स्थितीत कापसे यांच्याकडे ३२ हून अधिक नगरसेवकांचा पाठिंबा आहे. तसेच हा आकडा ४० पेक्षा अधिक असेल असा दावाही भाजपकडून केला जात आहे. त्यातच भाजपच्या काही फुटलेल्या नगरसेवकांनीही कापसे यांच्या नावाला विरोध नसल्याचे सांगत उपमहापौरपदाच्या सुरेश सोनवणे यांच्या नावाला विरोध असल्याचे सांगितले. यामुळे ऐनवेळी निवडणुकीत काही नगरसेवक पुन्हा परतण्याची शक्यता.
उणिवा
सद्य:स्थितीत भाजपमधील फूट कापसे यांच्यासह भाजपची डोकेदुखी ठरत आहे. भाजपकडून बहुमताच्या आकड्याचा दावा केला जात असला तरी मोठा गट शिवसेनेला जाऊन मिळाल्याने महापौरपदापासून दूर राहण्याचीही शक्यता आहे.
कुलभूषण पाटील
पहिल्यांदाच भाजपच्या तिकिटावर विजयी झाले असून, याआधी २०१३ मध्ये देखील त्यांनी अपक्ष म्हणून उमेदवारी अर्ज दाखल केला होता. मात्र, त्यावेळी त्यांचा पराभव झाला होता. शिवसेनेचे महानगरप्रमुख म्हणूनदेखील काही वर्षे काम पाहिले. २०१८ च्या निवडणुकीच्या वेळेस कुलभूषण पाटील यांनी भाजपमध्ये प्रवेश केला होता.