लोकमत न्यूज नेटवर्क
जळगाव : शहरातील मनपा कोविड केअर सेंटरमध्ये रुग्णांना दिल्या जाणाऱ्या जेवणाबाबत तक्रारी प्राप्त झाल्यानंतर मंगळवारी महापौर जयश्री महाजन यांनी कोविड केअर सेंटरमध्ये जाऊन स्वतः दर्जा तपासला. यामध्ये जेवणाची गुणवत्ता काही प्रमाणात चांगली असली तरी यामध्ये सातत्य कायम ठेवण्याच्या सूचना महापौरांनी ठेकेदाराला दिल्या आहेत.
शासकीय अभियांत्रिकी महाविद्यालयातील मनपा कोविड केअर सेंटरला भेट देत महापौर जयश्री महाजन व उपमहापौर कुलभूषण पाटील यांनी पाहणी केली. यावेळी नगरसेवक किशोर बाविस्कर, चेतन सनकत, कुंदन काळे, डॉ.विजय घोलप आदी उपस्थित होते. कोविड सेंटरमध्ये दिल्या जाणाऱ्या जेवणाची तक्रार असल्याने महापौर जयश्री महाजन यांनी जेवणाचा आस्वाद घेतला. मनपाचा कोविड केअर सेंटर मध्ये आलेल्या रुग्णांना चांगल्या प्रकारे जेवण देण्यात यावे, जेवणाचा गुणवत्तेत सातत्य कायम राहून याबद्दल कोणतेही रुग्णाची तक्रार यापुढे येऊ नये अशी सूचना महापौरांनी दिल्या आहेत.
अधिकाऱ्यांनी तक्रारीकडे लक्ष द्यावे
मनपाच्या कोविड केअर सेंटरमध्ये असलेल्या रुग्णांशी महापौर, उपमहापौर यांनी चर्चा केली असता काही रुग्णांनी जेवणाच्या तिखट, मीठ चवबाबत तक्रार केली. कोविड केअर सेंटरमध्ये काहीही तक्रार असल्यास संबंधित डॉक्टर आणि समन्वय अधिकाऱ्यांना कळवावे असे आवाहन महापौर जयश्री महाजन यांनी केले. तसेच मनपा अधिकाऱ्यांनी रुग्णांच्या तक्रारीकडे लक्ष द्यावे आणि त्वरित मार्गी लावाव्या अशा सूचना महापौर जयश्री महाजन यांनी केल्या.