असाच प्रामाणिकपणाचा प्रत्यय अमळनेर शहरातील एका गरीब माठ विक्रेत्या दाम्पत्यांकडून आला असून या दोघांनी पत्नीस सापडलेले रोख रकमेचे पाकीट स्वतः संबंधित व्यक्तीपर्यंत स्वतः पोहोचवले.
विशेष म्हणजे पाकीट परत केल्यानंतर त्या मोबदल्यात मिळत असलेले बक्षीसदेखील नाकारून पैशांची नसली तरी आपली मनाची श्रीमंती त्यांनी सिद्ध केली आहे. सुनीता रविकांत महाजन व रविकांत छोटू महाजन (अमलेश्वर नगर, माळीवाडा) असे या प्रामाणिक दाम्पत्याचे नाव असून पती व पत्नी दोघे दररोज डोक्यावर माठ घेत शहरात फेरी करून विक्रीचा व्यवसाय करतात. तीन दिवसांपूर्वी अमळनेर शहरातील नावीन्य पॅथॉलॉजी लॅबचे पॅथॉलॉजिस्ट शरद शेवाळे हे सकाळीच दुचाकीने आपल्या लॅबकडे जात असताना विद्याविहार कॉलनीजवळ त्यांच्या खिशातील पैशांचे पाकीट नकळत खाली पडले.
हे पाकीट माठ विक्रीसाठी जात असलेल्या सुनीता महाजन यांच्या नजरेस पडले. त्यांनी ते उचलून थोडा वेळ त्याच ठिकाणी थांबून कुणाचे पडलेय का? यासाठी वाट पाहिली. मात्र २५ मिनिो कुणीच न आल्याने त्यांनी ते पाकीट स्वतःजवळ ठेवून माठविक्री करून घरी गेल्या. इकडे शेवाळे यांना पाकीट गेल्याचे समजल्यावर तेही परेशान झाले होते. त्यांनी शोधही घेतला, पण मिळाले नाही. पाकिटात ५ ते ६ हजार रोकड शिवाय दोन एटीएम, ड्रायव्हिंग लायसन्स व्यतिरिक्त इतर महत्त्वाची कागदपत्रे होती. दुपारी सुनीता यांनी हे पाकीट पतीराज घरी आल्यानंतर त्यांना दाखवले. दोघांनीही हे पाकीट संबंधित व्यक्तीस परत करण्याचा निश्चय केला.
पाकिटातील लायसनवरून शेवाळे यांचे नाव व मोबाइल नंबर काढून त्यांना फोन करत तुमचे पाकीट आम्हाला सापडल्याचे सांगून त्यांना सुखद असा धक्का दिला. एवढेच नाही तर स्वतः दोन्ही पती व पत्नी त्यांच्या नावीन्य लॅबला येऊन जसेच्या तसे पाकीट त्यांनी परत केले. विशेष म्हणजे देऊ केलेले बक्षीसदेखील न घेतल्याने शरद शेवाळे व त्यांच्या पत्नी वैशाली शेवाळे यांनी या प्रामाणिक दाम्पत्याचा विशेष असा सत्कार करून कौतुक व आभार व्यक्त केले.