अमळनेर : शहरात टाकरखेडा धरणगाव रस्त्यावर वनजमिनीत जळालेल्या अवस्थेत एक प्रेत आढळून आल्यानंतर अज्ञात व्यक्तीविरुद्ध खुनाचा गुन्हा दाखल करण्यात आला आहे. जळगाव गुन्हे शाखा तथा एलसीबी निरीक्षक व त्यांच्या पथकाने गुरुवारी अमळनेरात भेट देऊन घटनास्थळी पाहणी केली. यानंतर हे पथक शहरातच मुक्कामी थांबले आहे.
ही घटना म्हणजे खुनाचाच प्रकार असावा आणि लपविण्याच्या उद्देशानेच त्यास येथे आणून टाकले असावे, असा अंदाज एलसीबीचा आहे. त्याआधी हा व्यक्ती नेमकी कोण व कुठली यास प्राधान्य देण्यात येत असून त्यानंतर खुनाच्या दिशेने पुढील तपास सुरू होणार आहे. मात्र परिस्थितीजन्य पुराव्यानुसार खुनाचा गुन्हा आधीच दाखल झाला असल्याची माहिती निरीक्षक किरणकुमार बकाले यांनी दिली.
रात्री उशिरापर्यंत हे पथक अमळनेर पोलीस ठाण्यात होते. अजून काही माहिती हाती लागली किंवा नाही त्याबद्दल अधिक समजू शकले नाही. दरम्यान, धरणगाव टाकरखेडे रस्त्यावर वनजमिनीत एक ३० वर्षीय युवकाचे प्रेत जळालेल्या अवस्थेत असल्याची माहिती पळासदळे येथील गणेश आत्माराम पाटील यांनी पोलिसांना दिल्यानंतर पोलीस अधीक्षक सचिन गोरे, डीवायएसपी राकेश जाधव, पोलीस निरीक्षक जयपाल हिरे, एपीआय राकेश परदेशी, पोलीस उपनिरीक्षक राहुल लबडे यांनी घटनास्थळी भेट दिली होती. त्या युवकाची पॅन्ट व अंडरवियर अर्धवट अवस्थेत जळलेली होती. तरुणाचा चेहरा पूर्णपणे जळालेला होता. घटनास्थळी काही लाकडे अर्धवट जळलेल्या अवस्थेत आणि एक रिकामी बाटली पडलेली दिसली. प्रेताची परिस्थिती विचित्र असल्याने डॉ. योगेश वाणी यांनी जागेवर जाऊन शवविच्छेदन केले होते.
दरम्यान, मयताच्या हातावर ओमचे चिन्ह गोंदलेले होते. त्याच्या छातीवर मारहाण झाल्याचे व पायाचे हाड मोडलेले दिसून आले. जवळच रक्त लागलेले लाकूडदेखील पडलेले होते. तसेच रिकाम्या बाटलीला पेट्रोलचा वास येत होता. त्यामुळे त्या युवकाला आधी मारहाण करून नंतर जाळण्यात आले असावे. ही घटना ३० ते ३१ मे दरम्यान घडली असावी, असा अंदाज व्यक्त करण्यात आला आहे.
प्रेताची नखे, केस, रक्ताचे नमुने डीएनए चाचणीसाठी फॉरेन्सिक प्रयोगशाळेत पाठवण्यात आले आहेत. घटनेचा तपास पोलीस निरीक्षक जयपाल हिरे करीत आहेत, मयताची व मारेकऱ्यांची माहिती अमळनेर पोलीस स्टेशनला कळवल्यास योग्य बक्षीस दिले जाईल, असे अमळनेर पोलिसांतर्फे कळविण्यात आले आहे.