भडगाव तालुक्यात यंदा सिंचन विहिरींच्या मुबलक पाण्यामुळे व गिरणा नदीसह जामदा उजवा व डाव्या कालव्यांना पाण्याचे आवर्तने मिळाली. परिणामी तालुक्यात रब्बी हंगामात व उन्हाळी हंगामात ज्वारी, बाजरी, भुईमूग, मका आदी पिकांचीही मोठी पेरणी झाली होती. या महिन्यात ज्वारी, मका, बाजरीसह पीक कापणी, काढणीची शेतकऱ्यांची मोठी धावपळ उडाली. आता भडगाव तालुक्यात तुरळक मात्र अखेरचा हंगाम काढण्यासाठी शेतकऱ्यांची घोडदौड सुरू आहे.
ज्वारी, बाजरी, मका, भुईमूग आदी पिकांच्या काढणीचा हा अंतिम टप्पा सुरू आहे. रानोमाळ शेतकऱ्यांसह मजूर काम करताना नजरेस पडत आहेत. खरीप हंगाम तोंडावर आला आहे. पावसाचे वातावरण तर कधी पाऊस पडत असल्याने शेतकऱ्यांची धावपळ उडत आहे. खरीप पीक पेरणीपूर्व शेतीमशागतीच्या कामांनाही सुरुवात झाली आहे. मळणी यंत्रासह शेतमजुरांच्या हातालाही काम मिळत आहे.