जळगाव : शनी पेठ भागातील प्रशांत सोनवणे खून प्रकरणात नगरसेवक कैलास सोनवणे व माजी उपमहापौर भारती सोनवणे यांच्यासह ११ जणांना आरोपी करण्याबाबतचा जिल्हा न्यायालयाचा आदेश औरंगाबाद उच्च न्यायालयाने कायम ठेवल्याने कैलास सोनवणे यांच्या समोरील अडचणी वाढल्या आहेत. दरम्यान, सर्वोच्च न्यायालयात दाद मागण्यासाठी सोनवणे यांना चार आठवड्यांची मुदत देण्यात आली आहे.
गुन्हा दाखल झाल्यानंतर मयत प्रशांत याची आई राधाबाई सोनवणे यांचा सीआरपीसी कलम १६४ प्रमाणे जबाब नोंदविला होता. यावेळी त्यांनी नगरसेवक कैलास सोनवणे, नंदकिशोर खुशाल सपकाळे, प्रल्हाद नारायण सोनवणे, भारती कैलास सोनवणे, संजय प्रभाकर साळुंखे, सागर प्रल्हाद सोनवणे, संजय गंगाराम सपकाळे, विलास नारायण सोनवणे, आदेश नरेंद्र सपकाळे, विशाल प्रल्हाद सपकाळे, जयदीप प्रल्हाद सोनवणे यांच्या विरुद्ध जबाब दिला होता.
जिल्हा न्यायालयात १६ जून रोजी राधाबाई यांची न्या.एम.क्यू.एस. एम.शेख यांच्या कोर्टात साक्ष झाली. ंत्यांनी या खून प्रकरणातील आरोपींसोबत नगरसेवक कैलास सोनवणे यांच्यासह ११ जणांना आरोपी करण्यासाठी अर्ज दिला होता. त्यानंतर १ ऑगस्ट रोजी न्या.शेख यांनी कैलास सोनवणे यांच्यासह ११ जणांना या खटल्यात आरोपी करून १४ ऑगस्ट रोजी न्यायालयात हजर राहण्यासाठी समन्स काढले होते. कैलास सोनवणे यांच्यासह अन्य संशयितांनी या निर्णयाला उच्च न्यायालयात आव्हान दिले होते. सर्व ११ आरोपींविरुद्ध २५ ऑगस्टपर्यंत कोणतीही कारवाई करू नये असे आदेश दिले आहेत.
अपीलसाठी चार आठवड्यांची मुदत
या प्रकरणाचे कामकाज सोमवारी न्या.एम.टी.जोशी यांच्या कोर्टात झाले. दोन्ही बाजूचे म्हणणे एकू न घेत कैलास सोनवणे यांनी दाखल केलेली याचिका फेटाळून लावली व जिल्हा न्यायालयाचा निर्णय कायम ठेवला. याचिकाकर्ते यांच्यातर्फे अँड.व्ही.डी. सपकाळ यांनी या निर्णयाच्या विरोधात अपिल करण्यासाठी चार आठवड्यांची मुदत मागितली. न्यायालयाने याचिकाकर्ते यांची ही मागणी मान्य केली. सरकारतर्फे अँड.एस.एम. जाधव यांनी कैलास सोनवणे यांच्यातर्फे अँड.व्ही.डी.सपकाळ यांनी तर राधाबाई सोनवणे यांच्यातर्फे अँड.आनंदसिंग बयास यांनी काम पाहिले.
८ जुलै रोजी झाला होता खून
प्रशांत सोनवणे याचा ८ जुलै रोजी शेळगाव रस्त्यावरील रामदासबुवा नाल्याजवळ अर्धवट जळालेंल्या स्थितीत मृतदेह सापडला होता. या प्रकरणी नशिराबाद पोलीस स्टेशनला खुनाचा गुन्हा दाखल झाल्यानंतर ९ जुलै रोजी मयत प्रशांत याची ओळख पटली होती.