अमळनेर : तालुक्यातील तरवाडे येथून एका १९ वर्षीय तरुणीला फूस लावून पळवून नेणाऱ्या शिरसाळ्याच्या पाच व सुरतच्या तिघांवर अपहरणाचा गुन्हा दाखल करण्यात आला आहे.
१७ रोजी रात्री ९ वाजेच्या सुमारास तरवाडे येथे राहणारी १९ वर्षीय तरुणी (मूळ टहाकळी, ता. धरणगाव) ही शौचास गेली होती. त्यावेळी शिरसाळे येथील तीन तरुण दानिश शेख निसार शेख, दिनेश भरत चौधरी, भूषण प्रकाश जैन हे मोटारसायकल घेऊन तिच्या अंगणात उभे होते. ती तरुणी परत आली नाही म्हणून मारवड पोलिसात हरवल्याची नोंद करण्यात आली होती. मात्र ती तरुणी तिघांसोबत मोटारसायकलवर निघून गेली. दुसऱ्या दिवशी तिचे मामा विजय सदाशिव पाटील व संदीप पाटील यांनी शिरसाळे येथे जाऊन तपास केला असता तेथील सतीश ऊर्फ सागर लक्ष्मण कोळी याने तिला पळवून नेले व त्यासाठी त्याला लक्ष्मण हिरामण कोळी याने (एमएच १८ डब्ल्यू ९८४१) हे वाहन करून दिल्याचे समजले.
त्यांनी त्या तरुणीला सुरत येथे पळवून नेऊन तिला आनंद सोनवणे, योगेश पाटील, नरेश कोळी (लिंबायत उधना, सुरत) यांच्या ताब्यात दिले. तसेच लक्ष्मण कोळी याने मुलीच्या मामांना तुम्ही जर पोलिसात तक्रार केली तर तुम्हाला जिवंत मारून टाकू, म्हणून दमबाजी करत शिवीगाळ केली. म्हणून मुलीचे मामा विजय सदाशिव पाटील यांच्या फिर्यादीवरून आठही जणांविरुद्ध अपहरणाचा गुन्हा दाखल करण्यात आला असून, तपास पोलीस उपनिरीक्षक वैभव पेठकर करीत आहेत. गेल्या महिनाभरात तालुक्यातील १६ तरुण तरुणी पळून गेल्याने पालक चिंतित आहेत.