लोकमत न्यूज नेटवर्क
चाळीसगाव : तालुक्यातील खडकीच्या दिशेने जात असलेल्या मालवाहतूक गाडीला भरधाव चारचाकी वाहनाने जोरदार धडक दिल्याने एकाचा मृत्यू झाल्याची घटना तालुक्यातील पातोंडा गावाजवळ शुक्रवारी सायंकाळी घडली.
याबाबतची माहिती अशी की, तालुक्यातील खडकी येथील राकेश दत्तू देसले (वय २९) हा मालवाहतूक गाडी (एमएच-४१-जी-६५६७) चालवीत खडकी गावाच्या दिशेने जात होता. तेव्हा पातोंडा गावाजवळील वळणावर चाळीसगावकडून भरधाव वेगाने येणाऱ्या चारचाकी वाहनाने (एमएच-०४-इएल-२८७०) जोरदार धडक दिली. या अपघातात राकेश दत्तू देसले यांचा दुर्दैवी मृत्यू झाला. हा अपघात शुक्रवारी सायंकाळी पाच वाजता पातोंडा गावाजवळील वळणावर घडला.
अपघात होताच अज्ञात वाहनचालक तेथून पसार झाला. राकेश देसले यांना ग्रामीण रुग्णालयात आणले असता वैद्यकीय अधिकाऱ्यांनी तपासून मृत घोषित केले. रतन श्रीपत पाटील, रा. खडकी, ता. चाळीसगाव यांच्या फिर्यादीवरून चाळीसगाव शहर पोलिसांत अज्ञात चालकाविरुद्ध गुन्हा दाखल करण्यात आला आहे. पोलीस निरीक्षक विजयकुमार ठाकूरवाड यांच्या मार्गदर्शनाखाली पुढील तपास अनिल अहिरे करीत आहेत.