सुनावणी प्रक्रिया करून मनपा घेणार निर्णय
लोकमत न्यूज नेटवर्क
जळगाव : शहरातील पिंप्राळा रेल्वे उड्डाणपुलाचे काम महिनाभरात सुरू करण्यासाठी रेल्वे प्रशासनाकडून हालचाली सुरू असताना, दुसरीकडे मात्र या पुलालगत तयार होणाऱ्या आर्मबाबत अजूनही मनपा प्रशासनाला तोडगा काढता आलेला नाही. त्यात या आर्ममुळे एकूण ४ मालमत्ता बाधित होणार असून, या मालमत्ताधारकांना मनपा प्रशासनाला नुकसानभरपाईची रक्कम द्यावी लागणार आहे. मात्र, मनपाकडून देण्यात येणारी ती रक्कम कमी असल्याने मालमत्ताधारकांनी नुकसानभरपाईची रक्कम घेण्यास नकार दिल्याची माहिती सूत्रांनी दिली आहे. दरम्यान, आता मनपाकडून पुन्हा सुनावणी प्रक्रिया घेण्यात येणार असून, त्यावर तोडगा काढण्याची तयारी आता मनपाने सुरू केली आहे.
गेल्या चार वर्षांपासून पिंप्राळा रेल्वेगेटवरील उड्डाणपूल मंजूर झाला आहे. मात्र, केवळ मनपा प्रशासनाच्या ढिसाळ नियोजनामुळे या कामाला अद्यापही सुरुवात होऊ शकलेली नाही. मनपा प्रशासनाकडून या पुलालगत भोईटेनगर भागाकडून येण्यासाठी आर्म असावा, अशी मागणी केली होती. या मागणीमुळे हे काम अद्यापही सुरू होऊ शकले नव्हते. मात्र, या आर्ममुळे भोईटेनगर भागातील काही मालमत्ता बाधित होणार आहेत. या मालमत्ताधारकांना नुकसानभरपाईची रक्कम देण्याची जबाबदारी महापालिकेची आहे. याबाबत फेब्रुवारी महिन्यात ठराव करण्यात आला होता. मात्र, चार महिने होऊनदेखील याबाबत कोणताही निर्णय किंवा सुनावणीदेखील होऊ शकलेली नाही.
लवकरच घेतला जाईल वाटाघाटीचा निर्णय
मनपाकडून या मालमत्ता ताब्यात न घेण्यासाठी कोरोनाचे कारण पुढे केले जात आहे, तर मालमत्ताधारकांनी दिलेल्या माहितीनुसार मनपा बाजारमूल्याच्या दरापेक्षाही कमी किंमत देण्याचा प्रस्ताव ठेवत असल्याची माहिती मिळाली आहे. त्यामुळे मालमत्ताधारकांनी मनपाचा प्रस्ताव मध्यंतरी फेटाळून लावला होता. आता मनपा प्रशासनाकडून लवकरच सर्व मालमत्ताधारकांना बोलावून घेत पुन्हा वाटाघाटीविषयी चर्चा करणार आहे. त्यानंतरच आर्मचा मार्ग मोकळा होण्याची शक्यता आहे.