वाघुर जलवाहिनीला अमृतच्या मुख्य जलवाहिनी जोडण्याचे काम आजपासून : पाणी पुरवठा एक दिवस पुढे ढकलला
लोकमत न्यूज नेटवर्क
जळगाव :गेल्या तीन वर्षांपासून शहरात अमृत अंतर्गत सुरु असलेल्या पाणी पुरवठा योजनेचे काम आता अंतिम टप्प्यात आले आहे. गुरुवारपासून अमृतची जलवाहिनी वाघुरच्या मुख्य वहिनीला जोडण्याचे काम सुरु होणार असून, अमृत अंतर्गत सर्वात आधी सुप्रीम कॉलनीवासीयांना ‘अमृत’चे पाणी मिळणार आहे. या कामांतर्गत सध्याच्या वाघूर जलवाहिनीला प्रिस्ट्स सिमेंट पाईप असून तो काढून त्याठिकाणी ५०० मिमीचा एमएस पाईप जोडला जाणार आहे. त्यामुळे शहराचा पाणीपुरवठा एक दिवस बंद ठेवावा लागणार असून, गुरुवारी होणारा पाणी पुरवठा एक दिवस पुढे ढकलण्यात आला आहे.
गेल्या तीन वर्षांपासून अमृतचे काम सुरु आहे. यामुळे रस्त्यांचा खोदकामामुळे नागरिकांना मोठ्या प्रमाणात त्रास देखील सहन करावा लागला होता. मात्र, आता हे काम ८० टक्के पुर्ण झाले असून, पहिल्या टप्प्यात सुप्रिम कॉलनी वासीयांना अमृतचे पाणी मिळणार आहे. सुप्रीम कॉलनीवासीय अनेक वर्षांपासून पाण्याचा समस्येपासून ग्रस्त होते. आता आठवडाभरात या भागात अमृत अंतर्गत पाणी पुरवठा होणार असल्याची माहिती महापौर भारती सोनवणे यांनी दिली.
महापौरांनी केली पाहणी
सुप्रीम कॉलनीवासीयांना आजवर कधीही नियमित पाणीपुरवठा झालेला नसून अमृत योजनेंतर्गत परिसरासाठी नव्याने यंत्रणा बसविण्यात आली असून पाणी साठवण टाक्या तयार करण्यात आल्या आहेत. सुप्रीम कॉलनीवासीयांचा पाणीप्रश्न कायमचा मार्गी लागण्याची प्रक्रिया अंतिम टप्प्यात आली आहे. बुधवारी महापौर भारती सोनवणे यांनी कामाची पाहणी केली. यावेळी नगरसेवक कैलास सोनवणे, गणेश सोनवणे, प्रवीण कोल्हे, प्रभाग समिती सदस्य विठ्ठल पाटील, चंद्रकांत भापसे, भूषण जाधव, मनपा शहर अभियंता अरविंद भोसले, बाबा साळुंखे, योगेश बोरोले, शामकांत भांडारकर, मक्तेदार प्रतिनिधी पंकज बऱ्हाटे आदींसह इतर अधिकारी उपस्थित होते.
आज होणार नाही पाणी पुरवठा
अमृतची जलवाहिनी वाघूरच्या जलवाहिनीला जोडण्यासाठी एक व्हॉल्व्ह बसविण्यात आला असून वाघूरच्या मुख्य वाहिनीला जोडणी करण्यास गुरुवारी सुरुवात होणार आहे. वाघूरच्या जलवाहिनीला ५०० मिमी व्यासाची लाईन जोडली जाणार असल्याने सुप्रिम कॉलनीतील नागरिकांना सुरळीत पाणीपुरवठा होऊ शकणार आहे. दरम्यान, या कामाळे एक दिवस पाणी पुरवठा थांबविण्यात आला असला तरी शुक्रवारपासून शहरात रोटेशननुसार सुरळीत पाणी पुरवठा होणार आहे.