पोलीस ठाण्यातच तक्रारदारांमध्ये हाणामारी

सूत्रांनी दिलेल्या माहितीनुसार, मंगळवारी सायंकाळी शहर पोलीस ठाण्यात ठाणे अंमलदार म्हणून सहायक फौजदार संगीता खांडरे या ड्युटीला असतानास सिंकदर खान व शोभा पवार या तक्रार देण्यासाठी आल्या व ठाणे अंमलदाराजवळ गेंदालाल मीलमधील नाजीमखा कदरखा पटवे, रिजवानाबी शेख आमीर,आबेदाबी व फरीदाबी जुबेर यांनी मागील भांडणाच्या कारणावरून आम्हाला मारहाण केली, अशी तक्रार नोंदवत असतानाच हे चौघे तेथे आले व आरडाओरड करून त्यापैकी नाजीमखा पटवे, फरीदाबी जुबेरखान यांनी सिकंदर व शोभा यांना मारहाण करायला सुरुवात केली. अचानक झालेल्या या प्रकारामुळे गोंधळ निर्माण झाला. तेव्हा उपनिरीक्षक अरुण सोनार, ठाणे अमलदार संगीता खांडरे, भूषण पाटील, संगीता इंगळे व मनीषा चव्हाण यांनी हस्तक्षेप करून दोन्ही गटांचा वाद मिटविला. पोलीस ठाण्यातच झोंबाझोंबी केली म्हणून भूषण पाटील या कर्मचाऱ्याच्या फिर्यादीवरून चौघांविरुद्ध गुन्हा दाखल करण्यात आला.