पितृदिन विशेष- वडीलच माझ्यासाठी ‘आई’सुद्धा; आईच्या निधनानंतर वडील आई व परमेश्वर

जितेंद्र शिंदे : शिक्षण घेत असतानाच आई वारल्यामुळे वडीलच ‘सर्वकाही’

प्रमोद पाटील

लोकमत न्यूज नेटवर्क

कासोदा, ता. एरंडोल : शालेय शिक्षण घेत असतानाच दीर्घ आजाराने आई वारली; पण तत्पूर्वी आईच्या आजारपणाचा मोठा खर्च, त्यानंतर आलेला अकाली मृत्यू, पुढे माझे शिक्षण, अशी दुहेरी जबाबदारी मला नोकरी लागेपर्यंत वडिलांनाच पार पाडावी लागली. आई- वडील व परमेश्वर हे सर्वकाही माझ्यासाठी वडीलच आहेत, अशा भावना जितेंद्र अजाबसिंग शिंदे याने व्यक्त केल्या आहेत.

२० जूनला साजऱ्या होणाऱ्या पितृदिनानिमित्त जितेेंद्रने आपल्या भावना व्यक्त केल्या.

अजाबसिंग बळीराम शिंदे हे तसे मूळचे जैतपीर, ता. अमळनेरचे; पण आर्थिक स्थिती अतिशय नाजूक असल्याने त्याकाळी अकरावीच्या वर्गानंतर पोटापाण्यासाठी अमळनेर सोडून यवतमाळ, जळगाव, मुंबई, अशा ठिकाणी कामासाठी जावे लागले.

पुढे टेलरिंगचा कोर्स केल्यानंतर परत अमळनेर येथे येऊन सुशिक्षित बेरोजगारांसाठी टेलरिंग काम शिकवण्याचे क्लास सुरू केले. त्यातच पत्नीला गंभीर आजार जडला. पत्नीचा आजारपणाचा खर्च नऊ वर्षे केला.

आई वारल्यानंतर चार बहिणी व मी अशांच्या शिक्षणाचा खर्च व कुटुंबातील खर्च यांची सांगड घालताना नाकीनऊ येत असतानाच मोठ्या धीराने व आत्मविश्वासाच्या जोरावर वडिलांनी चार बहिणींचा लग्नखर्च सोसला व मला इंजिनिअर बनविण्याचे अशक्यप्राय स्वप्न लीलया पार पाडले आहे.

वडिलांचे जास्त शिक्षण झालेले नसताना, तसेच आम्ही खुल्या प्रवर्गात मोडत असल्याने मुलांच्या शिक्षणासाठी आरक्षणाची सवलत नव्हती. योग्य काॅलेज शोधणे, त्या काॅलेजची महागडी फी भरणे, जेवण व राहण्याचा खर्च, हे मोठे दिव्य काम त्यांनी पार पाडले आहे.

ते माझ्यासाठी वडिलांसोबतच ‘आई’पण

मात्र, बाप हा बापच असतो. निधड्या छातीने संकटांवर मात करण्याचे कसब त्याला कुठल्याही शाळेत शिकायला जावे लागत नाही. आपल्या एकुलत्या मुलासाठी कष्ट करायला चार हात करण्यासाठी त्याची इम्युनिटी दहापट वाढते. असे धीरोदात्त माझे पिता अजबसिंग शिंदे यांनी मला उच्चशिक्षित इंजिनिअर बनवले. देशातील अग्रगण्य अशा एका नामांकित कंपनीत मुंबईत प्रोग्राम मॅनेजर, अशा महत्त्वाच्या पदावर मी कार्यरत आहे. याचे श्रेय माझ्या जन्मदात्याला जाते. ते माझ्यासाठी वडिलांसोबतच ‘आई’पण आहेत, अशी भावनाही जितेंद्र अजाबसिंग शिंदे याने व्यक्त केली.

===Photopath===

190621\img-20210619-wa0242.jpg

===Caption===

वडील अजबसिंग शिंदे सह इंजिनिअर पूत्र जितेंद्र शिंदे