लोकमत न्यूज नेटवर्क
जळगाव : वीजदर नियामक आयोगाने सर्व महाराष्ट्रात औद्योगिकचे एकच वीजदर ठेवले आहेत. सध्या राज्यात उच्चदाब व लघुदाबाचे प्रतियुनिट वीजदर ७ रुपये इतके आहे. मात्र, शासनाने विदर्भ व मराठवाड्याला एकूण बिलाच्या साडेसात टक्के वीज शुल्क २०२४ पर्यंत माफ केले आहे, तसेच शासनाकडून विदर्भ व मराठवाड्याला प्रतियुनिट १ रुपया सबसिडी असून, उत्तर महाराष्ट्रातील उद्योजकांना ५० पैसे सबसिडी आहे. शासनाच्या या धोरणामुळे उत्तर महाराष्ट्रातील उद्योजकांमध्ये नाराजी आहे. सर्व ठिकाणी विजेचे दर एकसमान असताना, विदर्भ व मराठवाड्याला बिलामागे साडेसात टक्के शासकीय कर लावण्यात येत नाही. मात्र, उत्तर महाराष्ट्रातील उद्योजकांना हा कर लावण्यात येतो. वारंवार शासनाकडून विदर्भ व मराठवाड्यालाच सवलती देण्यात येत असल्यामुळे उद्योगाला खीळ बसत आहे, त्यामुळे जळगाव जिल्ह्यातील आौद्योगिक विकास ठप्प झालेला आहे.