लोकमत न्यूज नेटवर्क
जळगाव : गेल्या काही दिवसांपासून खाद्य तेलामध्ये सुरू असलेल्या चढ-उतारमध्ये या आठवड्यात तेलाचे भाव पुन्हा वधारले आहे. सोयाबीन, शेंगदाणा तेलासह सूर्यफुलाच्या तेलाच्या भावात वाढ झाली आहे. महाशिवरात्रीच्या पार्श्वभूमीवर शेंगदाणा, भगरच्या भावात वाढ झाली, मात्र या वेळी साबुदाणा स्थिर राहिला. या सोबतच इतर किराणा मालाचे भाव मात्र स्थिर असून गेल्या दोन महिन्यांपासून खाद्य तेलाच्या भावात चढ-उतार सुरू आहे. यात गेल्या आठवड्यात सोयाबीन तेलात भाववाढ होऊन ते १२० ते १३० रुपये प्रति किलोवर पोहचले होते. त्यानंतर याही आठवड्यात ही भाववाढ कायम राहत तेलाचे भाव १३० ते १४० रुपये प्रति किलोवर पोहचले आहेत. शेंगदाण्याच्या तेलातही भाववाढ होऊन ते पुन्हा १८० ते १९० रुपये प्रति किलोवर पोहचले आहे. तसेच सूर्यफूल तेलाच्याही भावात वाढ होऊन ते १६० ते १६५ रुपये प्रति किलोवर पोहचले आहेत.
महाशिवरात्रीमुळे भाववाढ
महाशिवरात्रीनंतर शेंगदाणा, भगर, साबुदाणा यांची मागणी वाढली. यात भगरचे भाव वाढून ते १०० ते ११० तर शेंगदाण्याचे भाव १२५ ते १३० रुपये प्रति किलोवर पोहचले. मात्र साबुदाणा ६० ते ६५ रुपये प्रति किलोवर स्थिर आहे.
पालेभाज्यांचे भाव कमी
सध्या उन्हाळा सुरू झाला असला तरी यावेळी भाजीपाल्याचे भाव कमीच आहे. कोथिंबीर ३५ रुपये किलो तर मेथीही ३५ रुपये किलोवर आहे.
कांदे खाताहेत भाव
गेल्या काही दिवसांपासून बटाट्याचे भाव कमी होऊन ते २५ ते ३० रुपये प्रति किलोवर आले आहेत. मात्र कांद्याचे भाव अजूनही ३० ते ४० रुपयांच्या खाली येत नसल्याचे चित्र आहे. टमाटे १५ रुपये प्रति किलोवर असून त्यांची आवक चांगली आहे.
खाद्य तेलाचे भाव पुन्हा वाढल्याने दर आठवड्याला आर्थिक भार वाढतच आहे. कोथिंबीर, हिरव्या पालेभाज्यांचे भाव स्थिर असल्याने दिलासा आहे.
- संजय चौधरी, ग्राहक
खाद्य तेलाच्या भावात या आठवड्यात पुन्हा वाढ झाली आहे. शेंगदाण्याच्या भावात असलेली वाढ अजूनही कायम आहे.
- सचिन छाजेड, व्यापारी
सध्या हिरव्या पालेभाज्यांचे भाव स्थिर आहे. उन्हाळा असला तरी यंदा भाव कमी असल्याचे चित्र आहे.
- गणेश पाटील, भाजीपाला विक्रेते