जळगाव : नात्यातील ओळख व त्यानंतर प्रेमप्रकरण बहरल्याने लग्नाचा निर्णय घेतलेल्या प्रेमीयुगुलाला घरातून विरोध झाल्याने दोघांनी साथ जियेंगे, साथ मरेंगे असे म्हणत एकत्र येऊन विष प्राशन केले, यात सहा दिवसानंतर प्रेयसीचा मृत्यू झाला तर प्रियकर धोक्यातून बाहेर आला. मोहिनी निंबा कोळी (२२,रा.ममुराबाद) असे मृत्यू झालेल्या तरुणीचे नाव असून समाधान दगडू सैंदाणे (२३,रा.पिंगळवाडे, ता.अमळनेर) असे बचावलेल्या तरुणाचे नाव आहे.
सूत्रांनी दिलेल्या माहितीनुसार, ममुराबाद, ता.जळगाव येथील मोहिनीची मोठी बहिण अमळनेर तालुक्यातील पिंगळवाडे येथे दिलेली आहे. त्यामुळे मोहिनी हिचे तेथे येणे जाणे असल्याने बहिणीच्या नात्यातीलच समाधान याच्याशी तिचे सूत जुळले. दीड वर्षात दोघांमध्ये प्रेमप्रकरण बहरले. नात्यात असल्याने अडचण येणार नाही, असा ठाम विश्वास दोघांना होता. मात्र मोहिनीच्या कुटुंबियांकडून त्यास विरोध झाला. याची माहिती मिळाल्यानंतर समाधान याने १९ जानेवारी रोजी दुपारी ममुराबाद गाठले. गावाच्या बाहेर म्हाळसादेवी मंदिरानजीक मोहिनीला बोलावले. तेथे दोघांनी लग्न होत नाही तर जगण्यात अर्थ नाही असे म्हणत जगाचा निरोप घेण्याचा निर्णय घेतला आणि विष प्राशन केले. तत्पूर्वी मोहिनीने घरी फोन करुन तुम्ही लग्नाला परवानगी देत नाही म्हणून आम्ही आत्महत्या करीत असल्याचे कळविले. घाबरलेल्या कुटुंबियांनी तातडीने घटनास्थळ गाठले. दोघांच्या तोंडातून फेस येत असल्याने शासकीय वैद्यकीय महाविद्यालय व रुग्णालयात हलविले.
या काळात समाधानची प्रकृती सुधारली तर मोहिनीची रविवारी सकाळी प्राणज्योत मालवली. दरम्यान, पोलीस उपनिरीक्षक कदीर तडवी यांनी समाधान याचा जबाब नोंदविला असता, आमचे दोघांचे एकमेकावर प्रेम होते. आम्ही लग्न करणार होतो, मात्र कुटुंबातून विरोध झाल्याने विष प्राशन करुन आत्महत्या करण्याचा निर्णय घेतल्याचे सांगितले. समाधानचा रुग्णालयातून डिस्चार्ज झाला आहे. याप्रकरणी तालुका पोलीस ठाण्यात अकस्मात मृत्यूची नोंद करण्यात आली आहे. प्राथमिक हवालदार संजय चौधरी करीत आहेत.