जळगाव : कोरोना बाधित रुग्णांवर उपचारासाठी शनिवारी जिल्ह्यातील १३६ खाजगी रुग्णालयांना ७६० रेमडेसिविर इंजेक्शन्सच्या व्हायल्सचे वितरण करण्यात आले असल्याची माहिती जिल्हाधिकारी अभिजित राऊत यांनी दिली.
२४ एप्रिल रोजी जिल्ह्याला ७६० रेमडेसिविर इंजेक्शनच्या व्हायल्स प्राप्त झाल्या आहेत. त्यानुसार जिल्ह्यातील कोविड उपचार करणार्या ११७ खाजगी रुग्णालयांना ऑक्सिजन बेडच्या संख्येनुसार ३१५ रेमडेसिविर इंजेक्शन्सच्या व्हायल्स या महानगरपालिका, नगरपालिका, नगरपरिषदा व ग्रामीण क्षेत्रातील रुग्णालयांना वितरीत करण्यात आल्या आहेत. तर १९ कोविड हाॅस्पिटलला ४३६ व्हायल्स कंपनीकडून घाऊक विक्रेत्यांमार्फत परस्पर वितरण होत आहे. तर प्राप्त साठ्यापैकी १० टक्के साठा हा फ्रंटलाईन वर्कर्ससाठी राखीव ठेवण्यात येत आहेत.
ओळख आवश्यक
संबंधित कोविड रुग्णालयांनी सदरचा औषध साठा प्राप्त करून घेणेसाठी रुग्णालयाच्या लेटर हेडवर सही शिक्क्यासह प्राधिकारपत्र व प्राधिकृत व्यक्तीचे फोटो ओळखपत्र घाऊक विक्रेत्याकडे सादर करणे आवश्यक आहे. याबाबतची खातरजमा करून घाऊक विक्रेत्यांनी औषधाचे सुयोग्य वितरण सदर आदेशाच्या मुदतीत व शासकीय, वाजवी दरात करण्याबाबत सूचना देण्यात आल्या आहेत. त्यामुळे सर्व कोविड हॉस्पिटलमध्ये रुग्णांना थेट साठा उपलब्ध होत असल्याचे सांगण्यात आले.
जळगाव जिल्ह्यातील रेमडेसिविर इंजेक्शनचा तुटवडा विचारात घेता अन्न व औषध कार्यालय येथे नियंत्रण कक्ष कार्यान्वित करण्यात आला असून रेमडेसिविरचा काळाबाजार रोखण्याच्या अनुषंगाने शहरी व ग्रामीण भागात भरारी पथके प्रांताधिकारी व तहसीलदार यांच्या नियंत्रणाखाली स्थापन करण्यात आली असून त्यांच्यामार्फत रुग्णालये, स्टॉकिस्ट व वितरक यांच्याकडील रेमडेसिविरची उपलब्धता व सुयोग्य वापर यावर नियंत्रण ठेवण्यात येत आहे. त्यासोबतच महानगरपालिका, नगरपालिका प्रशासन व नगर पंचायतसह औषध व प्रशासन आयुक्तांनी प्राधिकृत केलेल्या आरोग्य अधिकार्यांनी नियंत्रण करण्याबाबतही सूचना देण्यात आल्या असल्याचे जिल्हाधिकाऱ्यांनी सांगितले.
रुग्णालयनिहाय वाटपची दररोज यादी
रेमडेसिविर इंजेक्शनचा काळाबाजार होऊ नये, याकरीता दररोज प्राप्त झालेल्या रेमडेसिविर इंजेक्शन रुग्णालयनिहाय वाटप करण्यात येवून केलेल्या वाटपाची रुग्णालयनिहाय रेमडेसिविर इंजेक्शन्सच्या संख्येसह व वितरकाच्या नाव व मोबाईल क्रमांकासह यादी तयार करण्यात येत असल्याचेही जिल्हाधिकारी राऊत यांनी सांगितले.