प्रयत्नांना यश : सक्रीय रुग्ण संख्या निम्म्यावर
जळगाव : जिल्ह्यात कोरोना बाधित रुग्णांची संख्या ११ हजार ८१३ वरुन ५ हजार ९१५ पर्यंत म्हणजेच निम्म्याने घटली आहे. त्याचबरोबर गेल्या काही दिवसांपासून बाधित रुग्णांपेक्षा बरे होणाऱ्या रुग्णांचे प्रमाण हे सतत वाढते आहे. ही जिल्ह्यासाठी अतिशय दिलासादायक बाब असली तरी नागरीकांनी गाफील न राहता यापुढेही कोरोनाच्या नियमांचे पालन करावे, असे आवाहन जिल्हाधिकारी अभिजित राऊत यांनी केले आहे.
जिल्ह्यात पहिल्या लाटेत सक्रीय रुग्णांची संख्या १२ हजारांच्या आसपास गेली होती. मात्र कडक निर्बध, केलेल्या विविध उपाययोजना, माझे कुटुंब, माझी जबाबदारी अभियान व संशयित रुग्ण शोध माहिम यामुळे जिल्ह्यात कोरोनाची पहिली लाट थोपविण्यात प्रशासनाला यश आले होते. पहिल्या लाटेत जिल्ह्यातील सक्रीय रुग्णांची संख्या १२ हजारांवरुन ३०४ पर्यंत (६ फेब्रुवारी २०२१रोजी) खाली आणण्यात यंत्रणेला यश आले होते. मात्र फेब्रुवारीच्या शेवटच्या आठवड्यात जिल्ह्यात कोरोनाची दुसरी लाट येण्यास सुरुवात झाली होती. या लाटेत जिल्ह्यात दररोज हजारो बाधित रुग्ण आढळून येत होते. १ एप्रिल, रोजी जिल्ह्यातील बाधित रुग्ण संख्या ११ हजार ८१३ या उच्चांकी पातळीवर पोहोचली होती. मात्र ब्रेक द चेन अतंर्गत जिल्ह्यातील कोरोनाचे निर्बध अधिक कडक करण्यात आले. शिवाय बाधित आढळणाऱ्या रुग्णांच्या संपर्कातील तसेच संशयित रुग्णांचा शोध घेऊन कोरोनाची लक्षणे दिसून येणाऱ्या व्यक्तींचे स्वॅब घेऊन कोरोना चाचण्या करण्यात आल्या. त्यामुळे बाधित रुग्णांचा लवकर शोध लागून वेळेत उपचार झाल्याने रुग्ण बरे होण्याचे प्रमाण तर वाढलेच शिवाय मृत्यूदर रोखण्यातही आरोग्य यंत्रणेला यश आले. सध्या जिल्ह्यात ५ हजार ९१५ सक्रीय रुग्ण आहेत.
४ हजारावर रुग्ण होम क्वारंटाईनजिल्ह्यात आतापर्यंत ११ लाख ५० हजार ७८३ संशयितांचे स्वॅब तपासणीसाठी कोरोना विषाणू प्रयोगशाळेत पाठविण्यात आले असून त्यापैकी १ लाख ३९ हजार ८२७ अहवाल पॉझिटीव्ह आले आहेत तर १० लाख ७ हजार ९२५ अहवाल निगेटिव्ह आले आहेत. जिल्ह्यात सध्या ४ हजार ७२२ रुग्ण होम क्वारंटाईन असून २१२ रुग्ण विलगीकरण कक्षात आहेत. सद्यस्थितीत जिल्ह्यात उपचार घेत असलेल्या ५ हजार ९१५ सक्रीय रुग्णांपैकी ४ हजार ९०४ रुग्ण लक्षणे नसलेले तर १ हजार ९ रुग्ण हे लक्षणे असलेले आहेत, अशी माहिती जिल्हा शल्य चिकित्सक डॉ. एन. एस. चव्हाण यांनी दिली आहे.