लोकमत न्यूज नेटवर्क
जळगाव : ढाब्यावर जेवणाला बसलेले असताना खुर्चीला लाथ मारून ती खुर्ची श्वानाला लागल्याच्या कारणावरून भुसावळचे माजी नगराध्यक्ष अनिल चौधरी व जळगाव मनपाचे माजी नगरसेवक सुनील माळी यांचे भाऊ मुकेश दत्तात्रय माळी एकमेकांच्या अंगावर धावून जाण्यासह पिस्तूल काढल्याने तणावाचे वातावरण निर्माण झाले होते. ही घटना रविवारी रात्री पावणेअकरा वाजता महामार्गावर खेडी शिवारातील हॉटेल न्यू पंजाब ढाब्यावर घडली. याप्रकरणी मंगळवारी एमआयडीसी पोलीस ठाण्यात अनिल चौधरी, मुकेश माळी, भगत बालाणी यांच्यासह नऊ जणांविरुद्ध दंगल व शस्रांचा गैरवापर केल्याचा गुन्हा दाखल करण्यात आला आहे.
ढाब्यावरील सीसीटीव्ही फुटेज तपासले असता त्यात चौधरी व माळी गट एकमेकांवर चालून येत असून, हाणामारी करताना दिसून येत आहेत. खुर्च्यांचीही तोडफोड झाली आहे. आवराआवर झाल्यानंतरही दोन्ही गट एकमेकांवर धावून येतात व परतीच्या वेळी एका जणाजवळ पिस्तूल दिसून येत आहे. घटना घडल्याची खात्री व पुरावे मिळाल्यावर पोलीस कर्मचारी मुकेश पाटील यांनीच सरकारतर्फे फिर्याद दिली. त्यात दंगल व शस्राचा वापर केला म्हणून गुन्हा दाखल करण्यात आला आहे.