जळगाव : चाळीस वर्षीय शेतमजुराने राहत्या घरात गळफास घेऊन आत्महत्या केल्याची धक्कादायक घटना शुक्रवारी सकाळी वसंतवाडी येथे घडली. प्रेमराज ठाकूर राठोड (वय : ४०) असे मयत शेतमजुराचे नाव आहे. गल्लीत काही मुले लपाछपी खेळत होते. त्यावेळी राठोड यांच्या घराजवळ लपण्यासाठी गेलेल्या मुलाला गळफास घेतलेल्या अवस्थेत मृतदेह दिसल्यानंतर ही घटना उघड झाली. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
तालुक्यातील वसंतवाडी येथे प्रेमराज राठोड हे पत्नी व दोन मुलांसह वास्तव्यास होते. शेतमजुरी करून कुटुंबाचा ते उदरनिर्वाह करायचे. पत्नी बाहेरगावी गेली होती. त्यामुळे ते व त्यांचे मुले हे घरी होते. दरम्यान, शुक्रवारी सकाळी दोन्ही मुले कामाला निघून गेले़ त्यातच घरात कुणी नसताना प्रेमराज राठोड यांनी गळफास घेऊन आत्महत्या केली. काही चिमुकले राठोड यांच्या घराबाहेर लपाछपी खेळीत होते. एक चिमुकला हा राठोड यांच्या घराकडे लपण्यासाठी आला. त्यावेळी त्याला काचेतून राठोड हे गळफास घेतलेल्या अवस्थेत दिसून आले. त्याने लागलीच परिसरातील नागरिकांना ही बाब सांगितली. परिसरातील नागरिकांनी त्याठिकाणी धाव घेऊन घटनेची माहिती पोलिसांना दिली.
दरवाजा तोडून केला प्रवेश
प्रेमराज राठोड यांनी ज्या खोलीत आत्महत्या केली. त्या खोलीचा दरवाजा बंद होता. नागरिकांना घटना कळताच, त्यांनी त्याठिकाणी धाव घेतली. नंतर दरवाजात तोडून खोलीत प्रवेश करीत राठोड कुटुंबीयांना घटनेची माहिती देण्यात आली. काहीवेळानंतर एमआयडीसी पोलीसही घटनास्थळी दाखल झाले होते. पंचनामा झाल्यानंतर मृतदेह विच्छेदनासाठी जिल्हा रुग्णालयात हलविण्यात आला होता.
अकस्मात मृत्यूची नोंद
मृतदेह रुग्णालयात हलविल्यानंतर नातेवाइकांसह ग्रामस्थांची त्याठिकाणी गर्दी झाली होती. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. प्रेमराज राठोड यांच्या पश्चात पत्नी लाचाबाई व प्रदीप आणि शुभम हे दोन मुले असा परिवार आहे. प्राथमिक तपास महेंद्र गायकवाड करीत आहेत.