आ.किशोर पाटील यांनी घातले साकडे
पाचोरा : पाचोरा व भडगाव तालुक्यात अतिवृष्टीमुळे झालेल्या नुकसानीची शेतकरी बांधवांना नुकसान भरपाई मिळावी या मागणीसाठी आमदार किशोर पाटील यांनी मुख्यमंत्री उद्धव ठाकरे यांची भेट घेऊन त्यांना मदतीसाठी साकडे घातले. मुख्यमंत्र्यांना मतदारसंघात पावसामुळे झालेल्या नुकसानीची माहिती देत कोरोनामुळे हवालदिल झालेल्या जनतेला यातून दिलासा देण्यासाठी शासनामार्फत भरघोस मदत देऊन नुकसान भरपाई द्यावी, अशी विनंती त्यांनी मुख्यमंत्री उद्धव ठाकरे यांना केली. मुख्यमंत्र्यांनी त्यांचे म्हणणे सविस्तरपणे ऐकून सर्वतोपरी मदतीचे आश्वासन दिले.
नुकत्याच पाचोरा व भडगाव तालुक्यात झालेल्या मुसळधार पावसामुळे तसेच औरंगाबाद जिल्ह्यातील सोयगाव तालुक्यातील भिलदरी येथील प्रकल्प फुटल्याने तितूर आणि गढद नदीला महापूर येऊन पाचोरा तालुक्यातील ११ तर भडगाव तालुक्यातील ४ गावांमध्ये पुराचे पाणी शिरल्याने मोठे नागरिकांचे मोठे नुकसान झाले आहे. दोन्ही तालुक्यात सुमारे ६० घरांची पडझड झाली असून अनेक घरांचे लहानमोठे नुकसान झाले आहे, तर सुमारे २५० हेक्टर क्षेत्रावरील पिके वाया गेल्याने शेतकऱ्यांच्या हाती तोंडी आलेला घास हिरावला गेला आहे. पाचोरा तालुक्यातील सावखेडा खुर्द गावाचा संपर्क तुटला होता. तसेच नगरदेवळा, कजगाव येथील पूलही वाहून गेल्याने अनेक गावांचा संपर्क तुटला आहे. याशिवाय अनेक गावात इलेक्ट्रीक तारा तुटून व विजेचे खांब पडल्याने काही गावांचा वीजपुरवठा खंडित झाल्याने शेतकरी हवालदिल झाले. त्यांच्या झालेल्या नुकसानीचे तत्काळ पंचनामे करण्याचे आदेश आ.किशोर पाटील यांनी प्रशासनाला दिले होते. त्यानुसार प्रांताधिकारी डॉ विक्रम बांदल यांनी संबंधित गावाचे तलाठी, ग्रामसेवक व कृषी सहाय्यकांमार्फत पंचनामे पूर्ण करून शासनास अहवाल सादर केला होता.
---
फोटो
100921\save_20210910_135230.jpg
मुख्यमंत्री उद्धव ठाकरे यांच्याशी चर्चा करताना आमदार किशोर पाटील