जळगाव : भाईचंद हिराचंद रायसोनी मल्टीस्टेट क्रेडीट सोसायटी अर्थात बीएचआरमधील घोटाळा प्रकरणात संस्थेचे प्रमोद भाईचंद रायसोनी (५५,रा.बळीराम पेठ, जळगाव) यांच्यासह १४ संचालकांवर मंगळवारी न्यायालयाने अपहार, फसवणूक, कट रचणे, पुरावा नष्ट करणे आदी दोषारोप ठेवले. रायसोनी याच्यासह सर्वच संचालकांनी आम्हाला गुन्हा कबुल नसल्याचे सांगत आरोप फेटाळले. सर्व संशयितांना कारागृहातून व्हिडीओकॉन्फरन्सद्वारे केले हजर करण्यात आले. पहिले सदर्थ सत्र न्यायाधीश आर.एन.हिवसे यांच्या न्यायालयात मंगळवारपासून राज्यातील सात गुन्ह्यांच्या खटल्याच्या सुनावणीला सुरुवात झाली. दोषारोप ठेवल्यानंतर आता पुढील कामकाज १५ डिसेंबर रोजी होणार आहे.
जिल्हा सरकारी वकील केतन ढाके यांनी थोडक्यात गुन्ह्याची पार्श्वभूमी, संचालकांवर असलेले आरोप न्यायालयास सांगितले. यावेळी आरोपींचे वकील अकिल इस्माईल हे देखील हजर होते.
या सात खटल्यांमध्ये ठेवले दोषारोप
बीएचआरमध्ये ठेवीदारांची फसवणूक, अपहार प्रकरणात राज्यात ८१ पोलीस ठाण्यांमध्ये गुन्हे दाखल आहेत. त्यात सात ठिकाणी दाखल झालेल्या गुन्ह्यांचे एकत्रित खटले न्या.हिवसे यांच्या न्यायालयात चालविले जात आहेत. त्यात सेलु (जि.परभणी), नालन पेठ (परभणी), खोलापुरी गेट (अमरावती), राजापेठ (अमरावती), सांगली, उदगीर शहर (लातूर) व खडकी (पुणे) यांचा समावेश आहे. या पोलीस ठाण्यांमध्ये दाखल गुन्हे सुनावणीला सुरुवात झाली आहे. यापूर्वी रामानंद नगरसह पाच ठिकाणच्या खटल्यांमध्ये संचालक मंडळावर दोषारोप ठेवण्यात आले आहे. ८१ पैकी आतापर्यंत १२ ठिकाणच्या गुन्ह्यात दोषारोप केले आहे.
हे आहे अटकेतील संचालक
बीएचआरमध्ये झालेल्या अपहार व फसवणूक प्रकरणात शिवराम चावदस चौधरी (८०,रा.शिव कॉलनी) यांच्या फिर्यादीवरुन राज्यातील पहिला गुन्हा रामानंद नगर पोलीस ठाण्यात कलम ४०९,४२०,१२० ब व महाराष्ट्र ठेवीदारांचे हितसंबंधाचे संरक्षण अधिनियम सन १९९१ चे कलम ३ प्रमाणे गुन्हा दाखल आहे. यात संस्थेचे संस्थापक प्रमोद भाईचंद रायसोनी (६०,रा.बळीराम पेठ, जळगाव), दिलीप कांतीलाल चोरडीया (५६), सुरजमल भबुतमल जैन (५५), दादा रामचंद्र पाटील (७१), भागवत संपत माळी (६८), राजाराम काशिनाथ कोळी (५२), भगवान हिरामण वाघ (६५), यशवंत ओंकार जिरी (६५)शेख रमजान शेख अब्दुल नबी मन्यार (६०),सुकलाल शहादू माळी (५०)ललिताबाई उर्फ लता राजू सोनवणे (४४) सर्व रा.तळेगाव, ता.जामनेर, मोतीलाल ओंकार जीरी (५५,रा.शेळगाव, ता.जामनेर), डॉ.हितेंद्र यशवंत महाजन (५७,रा.बेंडाळे नगर, प्रेम नगर, जळगाव) व इंद्रकुमार आत्माराम ललवाणी (४५,रा.महाबळ, जळगाव) यांना ३ फेब्रुवारी २०१५ रोजी अटक केली आहे. सर्व आरोपी जळगाव कारागृहात आहेत.