आरोपीस अटक : जिल्हापेठ पोलिसांची कामगिरी
जळगाव : नाथवाडा भागातील मदनलाल जैन यांच्या उघड्या घरातून ७0 हजार रुपयांचा ऐवज चोरून नेल्या प्रकरणातील आरोपी हर्षवर्धन सुदाम पवार (रा.गेंदालाल मिल) याला जिल्हापेठ पोलीस स्टेशनच्या डी.बी.पथकातील कर्मचार्‍यांनी सोमवारी अटक केली. चोरीच्या पैशांमधून घेतलेली रिक्षा व साहित्य पोलिसांनी जप्त केले.
गेल्या आठवड्यात जोशी कॉलनी जवळील नाथ वाड्यातील रहिवासी मदनलाल जैन यांच्या घरातून अज्ञात चोरट्याने ७0 हजार रुपयांची रक्कम गायब केली होती. या प्रकरणी औद्योगिक वसाहत पोलीस स्टेशनला गुन्हा दाखल होता.
या गुन्ह्यातील आरोपीबाबत जिल्हापेठ पोलीस स्टेशनचे उपनिरीक्षक गिरधर निकम, कर्मचारी रवी नरवाडे, राजेश मेढे, भांडारकर, अनिल पाटील, अलताफ पठाण यांना गुप्त माहिती मिळाली. आरोपी हर्षवर्धन पवार याच्या संशयास्पद हालचाली असल्याने त्यांनी ही बाब पोलीस निरीक्षक भाऊसाहेब पटारे यांना सांगितली.
त्यांनी पथकाला कारवाई करण्याची सूचना दिली. त्यानुसार या पथकाने हर्षवर्धन सुदाम पवार याला संशयावरून ताब्यात घेतले. त्याची विचारपूस केली असता त्याने मदनलाल जैन यांच्याकडे चोरी केल्याची कबुली दिली.
या चोरीच्या रकमेतून त्याने ४२ हजार रुपये डाऊन पेमेंट भरून एक रिक्षा घेतली होती. यासह रिक्षाचे टायर, ट्युब डिस्क व ज्ॉक विकत घेतले होते. उरलेल्या रकमेपैकी काही रक्कम त्याने बहिणीला रक्षाबंधननिमित्त भेटवस्तू स्वरूपात दिल्याची कबुली त्याने दिली.
जिल्हापेठ पोलिसांनी हर्षवर्धन याच्याकडून रिक्षा व अन्य साहित्य जप्त केले आहे. मुद्देमाल व आरोपीला औद्योगिक वसाहत पोलिसांच्या ताब्यात देण्यात आले आहे. या आरोपीकडून आणखी काही चोर्‍या व घरफोड्या उघड होण्याची शक्यता आहे.