लोकमत न्यूज नेटवर्क
जळगाव : राष्ट्रवादी काँग्रेसच्या अल्पसंख्याक सेलचे माजी प्रदेशाध्यक्ष हाजी गफ्फार मलिक यांच्या पार्थिवावर मंगळवारी दुपारी दफनविधी करण्यात आला. ईदगाह मैदान परिसरातील कब्रस्तानात त्यांच्यावर शोकाकुल वातावरणात अंत्यसंस्कार करण्यात आले. यावेळी उपस्थित मान्यवरांनी शोकसंवेदना व्यक्त केल्या.
हाजी गफ्फार मलिक यांचे सोमवारी रात्री १० वाजता ह्रदय विकाराने निधन झाले. त्यानंतर मंगळवारी दुपारी त्यांची अंत्ययात्रा काढण्यात आली. यावेळी काट्याफाईल शनिपेठमधील मस्जिद ए नुरमध्ये मोजक्या लोकांच्या उपस्थितीत जनाजा ए नमाज अदा करण्यात आली. मौलाना उस्मान यांनी नमाजचे पठण केले. त्यानंतर घाणेकर चौकापर्यंत त्यांची अंत्ययात्रा पायीच नेण्यात आली. त्यानंतर गाडीने ईदगाह मैदानापर्यंत आणण्यात आली. ईदगाह आणि कब्रस्तानाला दोन वेळा फेरी मारल्यानंतर जनाजा ए नमाज पुन्हा अदा करण्यात आली. यावेळी मौलाना अति कुर रहमान यांनी नमाज पठण केले. त्यानंतर त्यांचा दफनविधी पार पडला. त्यांचे पुत्र एजाज मलिक, नदीम मलिक, फैसल मलिक यांनी हे अंतिम विधी पार पाडले. यावेळी त्यांच्यावर प्रेम करणारे व त्यांचा चाहता वर्ग मोठ्या संख्येने उपस्थित होते.
शरद पवार यांनी केले ट्विट
राष्ट्रवादी काँग्रेसचे अध्यक्ष शरद पवार यांनी ट्विट करून आपल्या संवेदना व्यक्त केल्या. पवार यांनी ट्विट केले की, अल्पसंख्याक सेलचे माजी राज्य प्रमुख गफ्फार मलिक यांचे निधन दु:खदायक आहे. राजकीय क्षेत्रातील संयत तरीही आग्रही नेतृत्व त्यांच्या जाण्याने हरपले. त्यांच्या कुटुंबियांप्रती सहसंवेदना आणि श्रद्धांजली
मान्यवरांनी व्यक्त केल्या भावना
पालकमंत्री गुलाबराव पाटील यांनी सकाळी निवासस्थानी जाऊन त्यांच्या कुटुंबियांजवळ शोकसंवेदना व्यक्त केल्या. खासदार सुप्रिया सुळे यांनी देखील ट्विट करून आपल्या भावना व्यक्त केल्या आहेत. त्यासोबतच उपमुख्यमंत्री अजित पवार, मंत्री जितेंद्र आव्हाड, राष्ट्रवादीचे प्रवक्ते नवाब मलिक यांनीही ट्विटर वरून शोक संवेदना व्यक्त केल्या आहेत. राष्ट्रवादीचे प्रदेशाध्यक्ष जयंत पाटील, जिल्हाध्यक्ष ॲड. रविंद्र पाटील, माजी मंत्री गुलाबराव देवकर, माजी मंत्री एकनाथ खडसे, आमदार अनिल पाटील, आमदार शिरीष चौधरी, महापौर जयश्री महाजन, मनपाचे विरोधी पक्षनेते सुनिल महाजन, माजी महापौर नितीन लढ्ढा, भगत बालाणी, राजीव पाटील, शरद तायडे, मनियार बिरादरीचे फारूख शेख, सुनिल माळी यांनीही शोकसंवेदना व्यक्त केल्या.