लोकमत न्यूज नेटवर्क
जळगाव : ग्रामीण भागात मूलभूत सुविधा पुरविणे योजनेअंतर्गत जिल्ह्यात विविध कामांसाठी ४२ कोटी ५० लाख रुपयांच्या कामांना मंजुरी मिळाली आहे. यासाठी जिल्ह्यातील आमदार व इतर लोकप्रतिनिधींच्या मागणीनुसार पालकमंत्री गुलाबराव पाटील यांनी पाठपुरावा केला आहे.
राज्य शासनाने लोकप्रतिनिधींनी सुचविलेल्या ग्रामीण भागातील मूलभूत सुविधा पुरविणे ही योजना सुरू करण्यात आली आहे. या अनुषंगाने पालकमंत्री गुलाबराव पाटील यांनी जिल्ह्यातील सर्व आमदार व इतर लोकप्रतिनिधींनी केलेल्या मागणीनुसार मुख्यमंत्री, उपमुख्यमंत्री व ग्रामविकास मंत्री यांच्याकडे जिल्ह्यातील गावांतर्गत मूलभूत सुविधांच्या कामांसाठी निधी उपलब्ध होण्याबाबत पाठपुरावा केला होता. त्यानुसार जिल्ह्यातील सार्वजनिक बांधकाम विभागाकडे ४१७ कामांकरिता ३३ कोटी ५० लाख तर जिल्हा परिषदकडे २५९ कामासाठी ९ कोटी असा एकूण ६७६ कामांसाठी ४२ कोटी ५० लाखांच्या निधीच्या कामांना मंजुरी मिळाली आहे.
मंजूर कामे
या योजनेंतर्गत जिल्ह्यातील गावांमध्ये सभामंडप, मल्टीपर्पज हॉल, रस्त्यांवर व चौकाचौकात पेव्हर ब्लॉक बसविणे, रस्ते काँक्रिटीकरण, गटार बांधकाम, रस्त्यांचे खडीकरण व डांबरीकरण, चौक सुशोभिकरण, स्मशानभूमी बांधकाम व ॲप्रोच रस्ते, शेड बांधकाम, हायमास्ट लॅम्प बसविणे, गावांतर्गत छोटे पूल व मोऱ्या बांधकाम, सभागृह बांधकाम अशी विविध कामे करण्यात येणार आहेत.