जळगाव : प्राचार्य व सचिव पदावर नसतानाही त्या पदावर असल्याचे भासवून खोटे ठराव व संचालक मंडळाच्या खोट्या सह्या करुन आयडीबीआय बँकेत खान्देश बहुउद्देशीय संस्थेच्या उत्तर महाराष्ट्र नॉलेज सिटी, बांभोरी, ता.धरणगाव या संस्थेचे बनावट खाते उघडल्याप्रकरणी ज्योती सचिन पाटील व विलास मुलचंद पाटील या दोघांविरुध्द सोमवारी शहर पोलीस ठाण्यात फसवणुकीचा गुन्हा दाखल करण्यात आला आहे.
खान्देश बहुउद्देशीय संस्थेच्या उत्तर महाराष्ट्र नॉलेज सिटी, बांभोरी, ता.धरणगाव या संस्थेच्या खजिनदार यांनी पोलिसात दिलेल्या फिर्यादीनुसार विलास मुलचंद पाटील २०१३ पासून संस्थेत प्राचार्य पदावर होते तर ज्योती सचिन पाटील या २०१० ते २०१५ या कालावधीत सचिव होत्या. त्यानंतर त्या फक्त सभासद होत्या. गैरव्यवहाराच्या कारणावरुन संचालक मंडळाने २१ जुलै २०१९ रोजी ठराव करुन विलास पाटील यांना २६ जुलै २०१९ रोजी कायमस्वरुपी पदावरुन कमी केले होते. सप्टेबर २०१९ मध्ये महाविद्यालयातील विद्यार्थ्यांचे शुल्क दोघांनी खान्देश कॉम्प्लेक्समधील आयडीबीआय बँकेत भरणा केल्याचे समजल्यानंतर पोलिसांच्या माध्यमातून खाते कोणाच्या नावाने असल्याची माहिती काढली असता विलास पाटील व ज्योती पाटील हे दोघं जण खात्यावर व्यवहार करीत असल्याचे उघड झाले. बँकेत खाते उघडण्यासाठीही त्यांनी ५ मे २०१९ रोजी संस्थेची बैठक घेतल्याचे दाखवून बनावट ठराव, शिक्के व खोट्या सह्यांचा वापर केल्याचे उघड झाले. विद्यार्थ्यांना परस्पर शुल्क भरण्याचे सांगून खोट्या कागदपत्रांचा वापर करुन संस्थेची फसवणूक केली म्हणून दोघांविरुध्द गुन्हा दाखल करण्यात आला आहे.