लोकमत न्यूज नेटवर्क
चोपडा : महाराष्ट्रातील चंद्रपूरपासून ते इगतपुरीपर्यंत व्याप्ती असलेल्या इनरव्हील डिस्ट्रिक्ट ३०३ च्या डिस्ट्रिक्ट चेअरमनपदी चोपडा येथील भगिनी मंडळ संस्थेच्या सहसचिव तथा नगरसेविका अश्विनी गुजराथी यांची निवड झाली. नुकताच चोपडा येथे झालेल्या पदग्रहण समारंभात त्यांनी पदभार स्वीकारला. चोपड्याच्या इतिहासात एका आंतरराष्ट्रीय संस्थेच्या डिस्ट्रिक्ट चेअरमनपदी संधी मिळालेल्या त्या प्रथमच महिला आहेत.
समाजकार्य महाविद्यालयाच्या सभागृहात झालेल्या समारंभात अश्विनी गुजराथी यांनी मान्यवरांच्या उपस्थितीत मावळत्या डिस्ट्रिक्ट चेअरमन मीनल लाठी यांच्याकडून सूत्रे स्वीकारली. यावेळी मंचावर विधानसभेचे माजी अध्यक्ष अरुणभाई गुजराथी, इनरव्हीलच्या प्रमुख पदाधिकारी डॉ. रश्मी शर्मा हे प्रमुख अतिथी होते. त्यांच्यासमवेत मंचावर इनरव्हीलच्या पदाधिकारी मीनल लाठी, गिरीशा ठाकरे, शीला देशमुख, गौरी धोंड, रमा गर्ग व रोट्रॅक्टचे लोकेश बंसल हे उपस्थित होते. या समारंभास प्रसिद्ध मराठी अभिनेते प्रशांत दामले यांनीही ऑनलाइन उपस्थिती देत नवीन पदाधिकाऱ्यांना शुभेच्छा दिल्या.
यावेळी अरुणभाई गुजराथी यांचे मार्गदर्शनपर भाषण झाले. पदग्रहण सोहळ्याचे सूत्रसंचालन शुभ्रा व्यास व प्रीती दोषी यांनी केले तर आभार अंकिता जैन यांनी मानले. प्रारंभी महिला मंडळ शाळेच्या शिक्षिकांनी स्वागत गीत सादर केले तर अवनी गुजराथी यांनी उपस्थितांसमोर गणेश वंदना प्रस्तुत केली. या सोहळ्यास इनरव्हील डिस्ट्रिक ३०३ मधील सुमारे ६० महिला प्रतिनिधी प्रत्यक्ष तर सुमारे २०० प्रतिनिधी ऑनलाइन उपस्थित होत्या.