अमळनेर : सतत २४ अपघातास कारणीभूत ठरलेल्या धुळे रोडवरील अमळनेर शहराच्या प्रवेशद्वाराचे अपूर्ण काम तातडीने पूर्ण करावे यासाठी शिवसेनेने आक्रमक होत शुक्रवारी प्रवेशद्वाराजवळच रास्ता रोको आंदोलन केले.
शहरासाठी आकर्षण ठरणारे प्रवेशद्वार ठेकेदारच्या नियोजनाअभावी मृत्युद्वार ठरत आहे. रिफ्लेक्टर न लावणे, वळण मार्गाचे फलक न लावणे, तात्पुरत्या स्वरूपात लावलेली कच्ची बॅरॅकेडिंग वारंवार तुटून जात असल्याने वाहनचालकांना प्रवेशद्वार जवळील अडथळे दिसत नसल्याने तब्बल २४ अपघात झाले आहेत. बांधकाम विभागाचे अधिकारी याकडे दुर्लक्ष करीत असल्याने शिवसेना आक्रमक झाली. युवा सेनेचे उपजिल्हा प्रमुख श्रीकांत पाटील, नगरसेवक प्रताप शिंपी, उमेश अंधारे, अनंत निकम, अमर पाटील यांनी घोषणा देत वाहतूक रोखली होती. सुमारे पाऊण तास वाहतुकीची कोंडी निर्माण झाली होती. पोलीस उपनिरीक्षक गंभीर शिंदे, हेड कॉन्स्टेबल संजय पाटील, पोलीस नाईक शरद पाटील यांनी चोख बंदोबस्त ठेवला होता.