२९ गावांत ‘एक गाव एक गणपती’

परंडा : परंडा पोलीस ठाणे हद्दीत २९ ठिकाणी एक गाव एक गणपती, संकल्पना राबविण्यात आली आहे. शहरात परवानाधारक १६ तर विनापरवानाधारक ३ असे एकूण १९ तर ग्रामीण भागात ६० परवानाधारक तर विनापरवानाधारक १५ असे एकूण ७५ गणेश मंडळांनी श्रीची प्रतिष्ठापणा केली आहे. एक गाव एक गणपती संकल्पनेअंतर्गत सिरसाव, आरणगाव, लाखी, चव्हाणवाडी, कुंभेजा, आष्टा, पिठापुरी, खासापुरी, खासापुरी २, नालगाव, येणेगाव, टाकळी, कुंभेफळ, भोत्रा, आंधोरा, वांगी (खु.), पाचपिंपळा, देवांग्रा, ढगपिंपरी,जामगाव,साकत, जाकेपिंपरी, वागेगव्हाण, भोंजा, पिंपळवाडी, रोसा, देवगाव, घारगाव आदी गावामध्ये श्रीची प्रतिष्ठापणा झाली आहे. तर शहरात शिवाजीनगर गणेश मंडळ शिवाजीनगर, हंसराज गणेश मंडळ महात्मा फुले चौक, छत्रपती राजे तरुण गणेश मंडळ सोमवार गल्ली, शिवछत्रपती गणेश मंडळ आझाद चौक, जयभवानी गणेश मंडळ जयभवानी चौक, नवजीवन गणेश मंडळ मंडईपेठ, यशवंत गणेश मंडळ धनगर गल्ली, बालवीर गणेश मंडळ राजपुरा गल्ली, साईनाथ गणेश मंडळ चेतक रोड, मोरया तरुण गणेश मंडळ समर्थनगर, छत्रपती तरुण गणेश मंडळ काशीमबाग, विठ्ठल गणेश मंडळ कुऱ्हाड गल्ली, जय हनुमान टेंबे गणेश मंडळ पाटील गल्ली, नरवीर तरुण गणेश मंडळ मंगळवार पेठ, जय मल्हार गणेश मंडळ खंडोबा चौक, समर्थनगर तरुण गणेश मंडळ मंगळवार पेठ आदी ठिकाणी श्रींची प्रतिष्ठापना करण्यात आली असून, विविध मंडळांच्या वतीने समाजप्रबोधनात्मक कार्यक्रम घेण्यात येत आहेत. (वार्ताहर) कळंब : शहरातील व्यंकटेश गणेश मंडळ दरवर्षी गणेश उत्सवादरम्यान विविध उपक्रम राबवित असून, यंदा मंडळ व रोटरी क्लबच्या वतीने मृदु मूर्तीकला व चित्रकला स्पर्धांचे आयोजन करण्यात आले होते.रविवारी विठ्ठल मंदिर, बुरुड गल्ली येथे खुला गटासाठी जागतिक तापमान वाढीचे दुष्परिणाम व आदिवासी जीवनशैली आठवी ते दहावी गटासाठी वारली चित्रशैली व ग्रामीण जीवनशैली, पाचवी ते सातवी गटासाठी शाळेतील प्रसंग व पर्यावरण संवर्धन तर पहिली ते चौथी गटासाठी निसर्गचित्र व गणेशोत्सव या विषयावर चित्रकला स्पर्धा तर खुला गटासाठी ऐतिहासिक वस्तू व व्यक्तिशिल्प, आठवी ते दहावी गटासाठी बलुतेदार व वाहतूक साधन, पाचवी ते सातवी गटासाठी गणेशमूर्ती व फुलदाणी, पहिली ते चौथी गटासाठी गृहोपयोगी साहित्य व फळे या विषयावर मृदु मूर्तीकला स्पर्धा घेण्यात आली. या स्पर्धेत चित्रकलेसाठी व मृदू मूर्तीकला स्पर्धेसाठी दिवसभर पाऊस असतानाही शहरातील ३०० स्पर्धकांनी सहभाग नोंदविला. स्पर्धेतील कलाकृतीचे ६ व ७ रोजी मंडळासमोरील मैदानात प्रदर्शन भरविण्यात येणार असून, ८ रोजी निकाल व पारितोषिक वितरण करण्यात येणार आहे. या उपक्रमासाठी मंडळाचे अध्यक्ष संजय मालपाणी, शिवाजी पचमारे, सुरेश इंगळे, परमेश्वर मोरे, शरद आडसूळ, रोटरीचे अध्यक्ष डॉ. रामकृष्ण लोंढे, सचिव ब्रिजलाल भुतडा, प्रकल्प अध्यक्ष प्रा. किशोर मोरे, प्रा. सनजय घुले यांनी परिश्रम घेतले. कळंब : येथील आदर्श युवा गणेश मंडळातर्फे दरवर्षी विविध नाविण्यपूर्ण स्पर्धात्मक कार्यक्रमांचे आयोजन करण्यात येते. यंदाही मंडळाने ही परंपरा कायम जपली असून, गावातील तरुणांमध्ये व्यायामाचे महत्व वाढावे यासाठी सोमवारी खुल्या दंड बैठक स्पर्धा घेण्यात आल्या. तीन गटातून घेण्यात आलेल्या स्पर्धांना गावातील तरुणांनी उत्स्फूर्त प्रतिसाद दिला.हनुमान तालीम संघाच्या सदस्यानी या स्पर्धेत यशस्वी कामगिरी करून आपली छाप उमटविली. यात लहान गटात विजय धोंडीराम ठोंबरे याने तब्बल १००९ दंड बैठका मारुन प्रथम क्रमांक मिळविला. याच गटातून अभय गोविंद खडबडे याने ४७० दंड बैठका मारत दुसरा क्रमांक पटकाविला. मोठ्या गटातून अमोल अशोक पाटील याने ५६४ दंड बैठका मारुन प्रथम क्रमांक पटकाविला. स्पर्धेच्या यशस्वीतेसाठी तालीम संघाचे मार्गदर्शक भालचंद्र गुरव, जयराज परदेशी, गणेश म्हेत्रे, नाना खडबडे, अक्षय पाटील यांनी पुढाकार घेतला. यावेळी शहाजीराव पाटील, प्राचार्य डॉ. साजेद चाऊस, राजेंद्र मुंदडा आदींची उपस्थिती होती.