साळुंके यांचे यश
भोकरदन : तालुक्यातील पिंपळगाव कोलते येथील अमोल सांडू साळुंके यांनी एमपीएससीच्या वतीने घेण्यात आलेल्या पोलीस उपनिरीक्षक परीक्षेत यश संपादित केले आहे. ते २००७ पासून औरंगाबाद पोलीस दलात पोलीस कॉन्स्टेबल म्हणून कार्यरत होते. या यशाबद्दल साळुंके यांचे सर्वत्र स्वागत केले जात आहे.
दहशत पसरविणाऱ्यांवर कारवाईची मागणी
जालना : तालुक्यातील माळशेंद्रा ग्रामपंचायत सरपंच, उपसरपंच निवडीच्या काळात गोंधळ घालून दहशत पसरविणाऱ्यांवर कारवाई करावी, अशी मागणी ग्रामस्थांनी उपविभागीय अधिकारी, तसेच तालुका पोलीस ठाण्याच्या निरीक्षकांना दिलेल्या निवेदनात केली आहे. निवेदनावर सरपंच आनंद म्हस्के, शिवाजी जाधव, रामेश्वर जाधव, नारायण जाधव, गंगाधर जाधव, राजू म्हस्के, संजय म्हस्के, बालूू जाधव, ज्ञानेश्वर जाधव, हरी म्हस्के, कृष्णा लहाने, नवनाथ जाधव, शिवाजी काशीनाथ जाधव आदींची स्वाक्षरी आहे.
स्वयंरोजगार विकास प्रशिक्षण कार्यक्रम
जालना : मिटकॉन प्रशिक्षण केंद्राच्या वतीने आयोजित ऑनलाईन स्वयंरोजगार विकास प्रशिक्षणास प्रतिसाद मिळाला. युवकांना दालमिल, ऑइलमिल, कृषिप्रक्रिया, दुग्धप्रक्रिया, गांडूळखतनिर्मिती, जैविक तंत्रज्ञान, व्यक्तिमत्त्व विकास, संभाषण कौशल्य आदी विविध विषयांवर मार्गदर्शन करण्यात आले. तसेच युवकांना स्वत:चा उद्योग आणि कर्ज प्रकरणाची माहितीही तज्ज्ञ प्रशिक्षक, वरिष्ठ अधिकाऱ्यांनी दिली.