लोकमत न्यूज नेटवर्कजालना : गुलाबाची कळी जशी हळदीने माखली अशा एकापेक्षा एक मंत्रमुग्ध करणा-या वैशाली सामंत यांच्या गाण्यांवर सखी थिरकल्या. निमित्त होते लोकमत सखी मंचच्या वतीने आयोजित वैशाली सामंत यांच्या म्युझिकल कॉन्सर्टचे.लोकमत सखी मंचने भारती लॉन्समध्ये आयोजित केलेल्या वैशाली सामंत यांच्या म्युझिकल कॉन्सर्टमध्ये संगीत आणि सूत्रसंचालन विशेष आकर्षण ठरले. या कार्यक्रमाचे उद्घाटन नगराध्यक्षा संगीता गोरंट्याल, सुजाता मुथा, लोकमतचे जिल्हा प्रतिनिधी राजेश भिसे, शाखा व्यवस्थापक मकरंद शहापूरकर, वितरणचे किशोर मरकड यांच्या हस्ते दीपप्रज्वलनाने करण्यात आले.सायंकाळच्या प्रसन्न वातावरणात म्युझिक कॉन्सर्टला सुरुवात झाली. कार्यक्रमाच्या सुरुवातीला अनघा काळे आणि गौरव पवार यांनी गीते सदर केली. सुरुवातीला तीन ते चार गीते सादर झाल्यानंतर प्रेक्षकांमधूनच वैशाली सामंत यांची एण्ट्री झाली अन् सखी मंच सदस्यांनी एकच जल्लोष केला.वैशाली सामंत यांनी कोंबडी पळाली तंगडी धरुन लंगडी घालाया लागली, चमचम करता है ये नशिला बदन, ऐका दाजिबा... इ. सादर केलेल्या गीतांमुळे वातावरण अधिकच संगीतमय बनले होते. प्रत्येक गाण्यावर सखींनी ठेका धरला. तर सैराट झालं जी आणि झिंग झिंग झिंगाट या गाण्यांवर तर अनेक सखींनी व्यासपीठावरच ठेका धरला. अभय गायकवाड यांनी सूत्रसंचालन करताना वापरलेली ग्रामीण ढंगाची भाषा शैली आणि चुटकुल्यांमुळे अधूनमधून सखींच्या चेह-यांवर हास्याची लकेर उमटली.
गुलाबाची कळी बघा हळदीनं माखली..!
By लोकमत न्यूज नेटवर्क | Updated: March 8, 2018 00:56 IST