जालना : विविध ठिकाणांहून दुचाकी चोरणाऱ्या तिघांना स्थानिक गुन्हे शाखेच्या पथकाने शुक्रवारी ताब्यात घेतले. त्यांच्याकडून एक लाख ३० हजार रुपये किमतीच्या दोन दुचाकी जप्त करण्यात आल्या आहेत. सय्यद मोईज सय्यद मुसा (२४), काजी मुज्जकीर काजी मुक्तार (२०, दोघे रा. मलंगशहा मोहल्ला, परतूर) व मोहम्मद जफर मोहम्मद सादेक (२९, रा. सेवकनगर, परभणी) अशी ताब्यात घेतलेल्या संशयितांची नावे आहेत.
दुचाकी चोरीच्या गुन्ह्यांची माहिती घेत असताना, मोहम्मद जफर मोहम्मद सादेक याच्याकडे चोरीची दुचाकी असल्याची माहिती पोलिस निरीक्षक रामेश्वर खनाळ, पोउपनि. राजेंद्र वाघ यांना मिळाली. या माहितीवरून त्यांनी परभणी येथून मोहम्मद जफर मोहम्मद सादेक याला ताब्यात घेतले. त्याच्याकडे एक दुचाकी मिळून आली. त्याला सदरील दुचाकीबद्दल विचारले असता, त्याने सदरील दुचाकी सय्यद मोईज सय्यद मुसा, काजी मुज्जकीर काजी मुक्तार यांच्याकडून घेतल्याचे सांगितले.
त्या दोघांना परतूर येथून ताब्यात घेऊन त्यांच्याकडूनही एक दुचाकी जप्त करण्यात आली आहे. ही कारवाई पोलिस निरीक्षक रामेश्वर खनाळ, सपोनि. खांडेकर, पोउपनि. राजेंद्र वाघ, पोलिस अंमलदार राम पव्हरे, पोहेकॉ. रमेश राठोड, कैलास खार्डे, ईरशाद पटेल, सतीश श्रीवास, पोना. आक्रुर धांडगे यांनी केली आहे.