टेंभुर्णी : आपल्या मुलाला बसमध्ये बसवून देण्यासाठी सावंगी फाट्यावर आलेल्या एका इसमाला भरधाव वाहनाने धडक दिल्याची घटना जाफराबाद तालुक्यातील सावंगी- गोंधनखेडा फाट्यावर बुधवारी रात्री घडली. यात सुभाष कचरूबा अढावे (५५) हे जागीच ठार झाले.
सावंगी वरगणे येथील सुभाष कचरुबा अढावे हे आपल्या मुंबईला जाणा-या मुलाला बसमध्ये बसवून देण्यासाठी परिवारासोबत सावंगी फाट्यावर आले होते. फाट्यावरून रस्ता ओलांडताना भरधाव वेगाने जाणा-या एका अज्ञात वाहनाने त्यांना धडक दिली. यात अढावे हे गंभीर जखमी झाल्याने त्यांचा जागीच मृत्यू झाला. सावंगी येथील ग्रामस्थांनी त्यांना तातडीने टेंभुर्णी ग्रामीण रुग्णालयात आणले. मात्र तेथे डॉक्टरांनी तपासून त्यांना मृत घोषित केले. मयत अढावे यांच्या मृतदेहाचे गुरुवारी टेंभुर्णी येथे शवविच्छेदन करण्यात आले. त्यानंतर दुपारी सावंगी येथे शोकाकुल वातावरणात त्यांच्यावर अंत्यसंस्कार करण्यात आले. याप्रकरणी मयताचा मुलगा विलास आढावे यांच्या फिर्यादीवरून टेंभुर्णी पोलीस ठाण्यात गुन्हा दाखल करण्यात आला. त्यांच्या पश्चात पत्नी, दोन मुले, दोन मुली असा मोठा परिवार आहे. त्यांच्या अपघाती निधनाने परिसरात हळहळ व्यक्त केली जात आहे.
फोटो
मयत सुभाष अढावे