कुंभार पिंपळगावात वृद्ध वॉचमनचा खून

लोकमत न्यूज नेटवर्ककुंभार पिंपळगाव : जांब समर्थ मार्गावरील बोअरवेलच्या गोदामावरील ६५ वर्षीय वॉचमनचा चोरीच्या उद्देशाने अज्ञातांनी खून केल्याची घटना गुरुवारी पहाटे घडली. साहेबराव खंडेराव ठोके (६५) असे खून झालेल्या वॉचमनचे नाव आहे.कुंभार पिंपळगाव येथील जांब समर्थ मार्गावर असलेल्या बोअरवेलच्या गोदामात वॉचमन म्हणून साहेबराव ठोके हे काम करीत होते. चोरीच्या उद्देशाने चोरांनी त्यांच्या डोक्यावर घाव घातले.गंभीर जखमी झालेल्या ठोके यांना अंबड येथे हलविण्यात आले. परंतु डॉक्टरांनी त्यांना मृत घोषित केले. अंबड येथील उपजिल्हा रुग्णालयात शवविच्छेदन करण्यात आले. श्वान पथकाला पाचारण करण्यात आले. परंतु श्वान लिली ही रस्त्यावरच घुटमळत राहिली. घटनास्थळी अंबड उपविभागीय अधिकारी रमेश सोनुने यांनी भेट दिली. सायंकाळी साहेबराव ठोके यांच्यावर अंत्यसंस्कार करण्यात आले.