संजय लव्हाडेलोकमत न्यूज नेटवर्कजालना : कोरोना व्हायरसचे सावट आंतरराष्ट्रीय बाजाराबरोबरच आता जालना बाजारपेठेवरही पसरले आहे. दुकानांमध्ये शुकशुकाट असून, जवळपास सर्वच वस्तूमालांमध्ये मंदी आली आहे. चीनमधून येणारा इलेक्ट्रॉनिक्स माल तसेच गाड्यांचे सुटे भाग मात्र महागले आहेत. जंतूनाशके तसेच सॅनिटायझर्स इ. औषधांना मोठी मागणी असून, त्यांची टंचाई निर्माण झाली आहे.ग्राहकांनी कोरोना व्हायरसचा मोठा धसका घेतला आहे. स्थानिक किराणा तसेच धान्य मालाला उठाव नसल्यामुळे त्यांच्या दरात मोठी घसरण पहायला मिळत आहे. तर दुसरीकडे चीनमधून येणारे इलेक्ट्रॉनिक्स आयटम्स, गाड्यांचे स्पेअर पार्ट्स महागले आहेत. पुढील काळात व्यापार सांभाळून करावा लागेल. कारण तेजी मंदी केव्हा येईल, हे सांगता येत नाही. असे आता सर्वच व्यापाऱ्यांना वाटू लागले आहे.गव्हाची आवक ७०० पोती इतकी असून, भाव १६०० ते २२०० रुपये, बाजरीची आवक २०० पोते इतकी असून, १०० रुपयांच्या मंदीनंतर भाव १२५० ते २०००, मक्याची आवक ३०० पोती इतकी असून भाव ११०० ते १४५० असे आहेत. तुरीची आवक ५०० पोते इतकी असून भाव ४६०० ते ५१००, सोयाबीनची आवक १०० पोते आणि भाव ३२५० ते ३३०० आहे. हरभरा - आवक १००० पोती आणि भाव ३५०० ते ३६०० आहे. मोसंबीची आवक ५० टन इतकी असून दर टनामागे ४ ते ५ हजारांनी गडगडल्यामुळे भाव ८००० ते १२५०० रुपये प्रति टन असे झाले. तेलाचे दरही ५०० रुपये प्रति क्विंटल घसरले. सोयाबीन तेल ८३००, सरकी तेल ७८५० असे दर आहेत. गावरान गुळाचे भाव ३२०० ते ३५०० रुपये तर मध्य प्रदेशातून येणा-या गुळाचे भाव ३००० ते ३१०० रुपये असे आहेत. साखरेतही ५० रुपयांची मंदी असून भाव ३३८० ते ३५०० रुपये असे आहेत. हरभरा डाळीचे भाव ४६०० ते ४७००, तूर डाळ ७००० ते ८०००, मूग डाळ ९५०० ते १०५००, मसूर डाळ ५८०० ते ६०००, उडद डाळ ७५०० ते ९५००, शेंगदाणा ८५०० ते १००००, साबुदाणा ५००० ते ५७०० प्रति क्विंटल असे दर आहेत.शनिवार व रविवारी सुटी असताना देखील मोतीबागेत शुकशुकाट आढळला. त्यामुळे भेळ- रगडा, पाणीपुरी, आईस्क्रीम इ. छोट्या व्यावसायिकांना मोठा फटका बसत असल्याचे दिसून आले.
कोरोना संकटामुळे बाजारपेठेत शुकशुकाट
By लोकमत न्यूज नेटवर्क | Updated: March 16, 2020 00:18 IST